काठमाडौं । प्रस्तावित प्रधानन्यायाधीश हरिकृष्ण कार्कीविरूद्ध ३० उजुरी परेको छ ।

संघीय संसद्अन्तर्गत रहेको संसदीय सुनुवाइ समितिमा ३० उजुरी परेको सचिवालयले जानकारी दिएको छ । शुक्रबारसम्म उजुरीको लागि दिइएको समयमा ३० वटा उजुरी परेका हुन् ।

उजुरीको विषयवस्तुबारे जानकारी नखुलाइए पनि अधिंकाश उजुरी उनले वकालत, न्यायाधीशका रुपमा नियुक्ति र न्यायधीश भएपछिका उनकै पेसासँग सम्बन्धित रहेको बुझिएको छ ।

“उजुरी खुलाउन मिल्दैन । २९, ३० वटा उजुरी परेको छ,” समितिका एक कर्मचारीले भने, “उजुरी दिएपछि समितिले खोल्छ र सांसदहरूलाइ वितरण हुन्छ । संसद् चलिरहेकाले बैठक बस्न नसकेको हो । भोलिसम्ममा बैठक बस्नसक्ने सम्भावना छ ।”

२०७८ साल फागुन १ गतेदेखि न्यायालय प्रमुखविहीन बनेको छ । तत्कालीन प्रधानन्ययाधीश चोलेन्द्र शम्शेर जबरालाई महाअभियोग लागेपछि न्यायालय कामु प्रधानन्यायाधीशको भरमा सञ्चालन भइरहेको हो ।

गतवर्ष असोजदेखि कामु नेतृत्व सम्हालेका कार्कीलाई मंसिर २७ पछि महाअभियोगसहित चोलेन्द्रले अवकास पाएपछि पनि ढिला गरी मात्रै संवैधानिक परिषद्ले प्रधानन्यायाधीशमा सिफारिस गरेको हो । सिफारिसको लामो समयपछि बल्ल उनको सुनुवाइ हुन लागेको छ ।