काठमाडौं । नेकपा (एमाले)ले ‘वडामा सदस्यको अनुपात, कम्तीमा ३ प्रतिशत अभियान’ चलाउने भएको छ । गएको वैशाख २८–३० गतेसम्म चलेको केन्द्रीय कमिटी बैठकको निर्णय समेटेर अध्यक्ष केपी शर्मा ओलीले जारी गरेको अन्तर पार्टी निर्देशन (अपानि)मा अभियानबारे उल्लेख छ । 

सदस्यता शुद्धीकरण, नवीकरण, विस्तार र तथ्यांक शुद्धीकरणअन्तर्गत प्रदेशमा कारणवश नवीकरण छुटेकाहरूको आवेदनमाथि असार १५ सम्म जिल्ला कमिटीले आवश्यक निर्णय गर्ने भनिएको छ । 

त्यस्तै, नयाँ निर्णय भएका सदस्य, नवीकृत सदस्य र नयाँ सदस्यसहित सम्पूर्ण सदस्यहरूको विवरण प्रदेशमार्फत असार मसान्तसम्म केन्द्रीय संगठन विभागमा पठाउने निर्देशन दिइएको छ  । 

“अभियानअघिको सदस्यता रेकर्ड हेर्ने हो भने त्यो संख्या मतदाताको अनुपातमा औसत ६ प्रतिशत छ । तर, कतिपय पालिकाका वडाहरूमा अत्यन्त न्यून संख्यामा पार्टी सदस्य रहेको देखिन्छ,” अपानिमा भनिएको छ, “त्यसैले, आगामी निर्वाचनमा 'मिसन–१५०' पूरा गर्न प्रदेश/प्रदेशमा कुल मतदाताको ६ प्रतिश र प्रत्येक वडामा कम्तीमा ३ सदस्य पुर्‍याउने गरी सदस्यता विस्तारको कार्ययोजना बनाई लागू गर्ने । यसका लागि 'वडामा सदस्यको अनुपात, कम्तीमा ३ प्रतिशत अभियान' नै चलाउने ।”

सदस्यता विस्तार गर्दा मापदण्डको पालना गर्दै नयाँ सदस्यहरूको आवेदन लिने र त्यसमाथि प्रक्रियाबमोजिम निर्णय गर्ने काम निरन्तर जारी राख्ने अपानिमा उल्लेख छ ।