काठमाडौं । नेपाली कांग्रेसको संस्थापनइतर समूहका नेताहरूले थालेको पार्टी रूपान्तरण अभियानले कर्णाली प्रदेशमा कार्यक्रम गरेको छ ।

मधेस प्रदेशबाट सुरु भएको अभियानले वाग्मती र गण्डकी प्रदेशपछि कर्णालीमा कार्यक्रम गरेको हो । 

मंगलबार कर्णाली प्रदेशको राजधानी सुर्खेतमा कार्यक्रम सम्पन्न भएको छ । कार्यक्रममा बोल्दै अभियान्ता तथा इतर समूहका नेता जगदिश्वरनरसिंह केसीले रूपान्तरण अभियानले कार्यकर्तामा देखिएको निराशालाई आशामा बदल्ने विश्वास व्यक्त गरे ।

“नेतृत्वले गलत गरिरहेको छ । हामी टुलुटुलु हेरेर मात्र बस्न सक्ने अवस्थामा छैनौँ,” केसीले भने, “कार्यकर्तामा देखिएको निराशालाई आशामा बदल्नु छ । हामीहरू अहिले प्रदेशस्तरीय अभियानमा छौँ । यो सकेपछि जिल्लाजिल्लामात्र होइन वडासम्म पुग्छौँ ।”

उनले नेतृत्वप्रतिको वितृष्णाको कारण कार्यकर्तामा निराशा आएको बताए ।

केन्द्रीय सदस्य मधु आचार्य, चन्द्रमोहन यादव नेता गुरूराज घिमिरे, भुपेन्द्रजंग शाही, लक्ष्मणलाल राय यादव, रञ्जित कर्णसहितका नेताहरू अभियानमा छन् ।

रूपान्तरण अभियान अन्तर्गत आगामी जेठ २६ गते सुदूरपश्चिम प्रदेशको राजधानी धनगढीमा र जेठ २९ मा कोसी प्रदेशको इटहरीमा प्रदेशस्तरीय भेला गर्ने तयारी गरेको छ ।

पार्टी इतिहासकै संकटमा परेको भन्दै अभियानका सहभागी नेताहरूले पार्टी सुधार र कार्यकर्तामा उत्साह भर्न अभियान आयोजना गरेको बताएका छन् ।