काठमाडौं । सत्तारूढ दल नेपाली कांग्रेसका सांसद रामहरी खतिवडाले आफ्नै पार्टीबाट प्रतिनिधित्व गर्ने अर्थमन्त्रीमाथि प्रश्नैप्रश्न उठाएका छन् ।

मंगलबारको प्रतिनिधिसभा बैठकको सुरूआतमै उनले बजेट बनाउँदा अनधिकृत व्यक्तिलाई कसले प्रवेश दियो भन्दै खतिवडाले अर्थमन्त्री प्रकाशशरण महतलाई प्रश्न गरे ।

उलने बेरूजु विशेषज्ञ भनेर नियुक्त गरिएको रिटायर्ड कर्मचारी रामकृष्ण श्रेष्ठलाई किन नियुक्त गरिएको भन्दै प्रश्न गरे । उनले कसको चाहनामा नियुक्त गरेको भन्दै प्रश्न गरे ।

“अर्थ मन्त्रालयमा एकजना कर्मचारी रामकृष्ण श्रेष्ठलाई २०७९ साल फागुन १९ गतेका दिन नेपाल सरकारले निर्णय गरेर नियुक्त गरेको देखिन्छ । त्यतिबेला अर्थमन्त्री को थिए ?,” खतिवडाको प्रश्न थियो, “दुई वर्षअघि रिटार्यड भएको कर्मचारीलाई नियुक्त गर्नुपर्ने जरुरी के पर्यो ? फागुन २५ गतेदेखि लागु हुने गरी २०८० साल असाढ मसान्तसम्म रहने गरी महिनाको ३४ हजार ४३० रूपैयाँ तलब पाउने गरी किन, कसको इन्ट्रेस्टमा नियुक्त गरिएको हो ? त्यसको जवाफ म अर्थमन्त्रीबाट चाहन्छु ।”

उनले थपे, “बेरुजु विशेषज्ञको रूपमा उसलाई नियुक्त गरिएको छ, यति धेरै अधिकार दिएर तत्कालीन अवस्थामा केका लागि नियुक्त गरियो ? कसले नियुक्त गर्यो ? अर्थमन्त्रीबाट जवाफ चाहन्छु । उसलाई किन निरन्तरता दिनुपर्यो ? यसको जवाफ चाहन्छु ।”