काठमाडौं । राष्ट्रपति रामचन्द्र पौडेलले पृथ्वी, मानव र प्राणीजगत्को भविष्य सुरक्षित गर्नका लागि हिमाल र हिमाली क्षेत्रको संरक्षणको आवश्यकता औँल्याएका छन् ।

पहिलो सगरमाथा आरोहीद्वय सर एडमन्ड हिलारी र तेन्जिङ नोर्गे शेर्पाका परिवारजनसहित हिमालयन ट्रस्ट यूकेका पदाधिकारीसँग शनिबार शीतलनिवासमा भएको भेटमा उनले सो धारणा राखेका हुन् ।

सो अवसरमा राष्ट्रपति पौडेलले जलवायु परिवर्तनले विश्वव्यापी रूपमा पारेको असर न्यूनीकरण गरी पृथ्वी र सम्पूर्ण मानवजातिको हितका लागि हिमाल, हिमाली क्षेत्र र जैविक विविधताको संरक्षण आवश्यक रहेको बताए ।

“विश्वको वातावरणको संरक्षण हिमालबाट सुरु गर्नुपर्छ । किनकि, पानीको मूल स्रोत हिमाल हो,” उनले भने ।

नेपाल सरकारले आफ्नो नीति तथा कार्यक्रममा पनि हिमाली क्षेत्र र वातावरण संरक्षणमा जोड दिएको उनले उल्लेख गरे ।

सगरमाथा र यस क्षेत्रको जैविक विविधताको संरक्षणका लागि विश्व समुदायले नै काँधमा काँध मिलाएर अघि बढ्नुपर्ने उनको भनाइ थियो ।