विराटनगर । कोसी सरकारले नामकरणको विरोधमा आन्दोलनरत पक्षलाई वार्तामा बोलाएको छ । नामकरणविरुद्धको आन्दोलनले उग्ररूप लिन थालेपछि सरकारले वार्ताको आह्वान गरेको हो ।

सरकारका प्रवक्तासमेत रहेका मन्त्री भक्तिप्रसाद सिटौलाले मंगलबार एक वक्तव्य जारी गर्दै आन्दोलनरत पक्षलाई वार्तामा आउन आग्रह गरेका हुन् । शान्तिपूर्ण ढंगबाट गरिने विरोध र आलोचनाले लोकतन्त्रलाई सुदृढ र मजबुत गर्ने सरकारको धारणा रहेको जनाउँदै उनले वार्तामा बोलाउने निर्णय भएको जानकारी दिए ।‌

पूर्वघोषित आन्दोलनका कार्यक्रमलाई स्थगन गरी वार्ता र संवादका माध्यमबाट निकास खोज्न सरकारले आग्रह समेत गरेको छ । 

कोसी प्रदेश खारेज गरी पुनः नामकरणको पक्षमा रहेको संघर्ष समितिका अध्यक्ष डिकेन्द्र सिंह थेगिमले आफूहरू सकारात्मक वार्ताको पक्षमा रहेको बताएका छन् ।

आन्दोलनको घटकमध्येको एक किरात मोर्चाका महासचिव तेन्धङ किरातले पनि वार्ताको पहल हुनु सकारात्मक भएको बताए । उनले भने, "सरकारले औपचारिक पत्राचार गर्नासाथ हामीहरू वार्तामा बस्छौँ ।"

प्रदेश राजधानी विराटनगर केन्द्रित आन्दोलन चर्किरहेको अवस्थामा सरकारलाई वार्ता गर्न सत्तापक्ष र विपक्षी दलका सांसदहरूले वार्ता गर्न दबाब दिइरहेका थिए ।

आइतबार प्रदेस सभा सचिवालय नजिकै देवकोटा चौकमा झडप हुँदा सुरक्षाकर्मी र आन्दोलनकारी घाइते भएका थिए । त्यसक्रममा ८६ जना आन्दोलनकारी पक्राउ परेका थिए । 

फागुन १७ गते प्रदेश सभाबाट कोसी नाम कायम भएसँगै पहिचनावादीले प्रदेशभर आन्दोलन थालेका थिए ।