काठमाडौं । खराब ब्याटिङ गरेको नेपालले मलेसियासँगको ट्वान्टी–२० शृंखलाको पहिलो खेलमा पाँच विकेटको हार बेहोरेको छ । सोमबार मलेसियाको बांगीमा भएको खेलमा टस हारेपछि ब्याटिङमा आएको नेपाल १६.५ ओभरमा ५० रनमै समेटिएको थियो । ५१ रनको सामान्य लक्ष्य मलेसियाले १३.२ ओभरमा पाँच विकेट गुमाएर पूरा गर्यो ।

मलेसियाको जितमा वान जुलियाले १३ र ऐना हमिजाह हसिमले १२ रन जोडे । यसबाहेक, ऐना नाज्वाले आठ, कप्तान मास एलिसाले ६ र क्रिस्टिना बारेतले तीन रन बनाए ।

नेपालका सीता रानामगर र रुविना क्षेत्रीले समान दुई विकेट लिए । कविता कुवरले एक विकेट लिइन् ।

मलेसियाका बलरविरुद्ध निरिह देखिएका नेपालका कुनै पनि ब्याटरले उल्लेखनीय प्रदर्शन गर्न सकेनन् । नेपाली टिमको खातामा सोनु खड्काले १३ र ज्योती पाण्डेले ११ रन बनाए । यसबाहेक नेपाली टिमका अन्य ब्याटरले दोहोरो अंकमा रन जोड्न सकेनन् । नेपाली टिमको खातामा काजल श्रेष्ठले ६, इन्दु वर्माले तीन र कप्तान रुविना क्षेत्रीले दुई रन जोडे । 

नेपालका तीन ब्याटर शून्यमा पभेलियन फर्किएका थिए । नेपालले मलेसियाबाट ११ अतिरिक्त रन पाएको थियो । ४१–४ को अवस्थामा रहेको नेपालले त्यसपछि नौ रन जोड्दा बाँकी ६ विकेट गुमायो ।

नेपाललाई सस्तैमा समेट्न मलेसियाकी निक नुर अतिएलाले तीन विकेट लिइन् । चार ओभर बलिङ गरेकी अतिएलाले एक मेडन राख्दै नौ रनमात्र खर्चिइन् । ऐना हमिजाह हसिम, आइसा एलिसा र महिराह इजाती इस्माइलले समान दुई विकेट लिइन् ।

जितसँगै मलेसियाले पाँच खेलको शृंखलामा १–० को अग्रता बनाएको छ । शृंखलाको दोस्रो खेल भोलि (मंगलबार) हुनेछ ।