काठमाडौं । लौटारो मार्टिनेजको दुई गोलमा फियोरेन्टिनालाई हराउँदै इन्टर मिलानले कोपा इटालियाको उपाधि रक्षा गरेको छ ।

बुधबार सम्पन्न फाइनलमा अर्जेन्टिनी फरवार्ड मार्टिनेजको दुई गोलप्रेरित इन्टरले फाइनलमा फियोरेन्टिनालाई २–१ ले पराजित गर्यो । खेलको सुरुआतमै निकोलस गोन्जाजेजको गोलमा फियोरेन्टिनाले इन्टरमाथि दबाब बनाएको थियो । तर, पहिलो हाफमै दुई गोल फर्काएर इन्टरले अग्रता बनाएको थियो ।

मार्टिनेजले २९औं मिनेटमा गोल गर्दै इन्टरलाई बराबरीमा फर्काएका थिए । त्यसको आठ मिनेटपछि मार्टिनेजकै गोलमा इन्टरले फियोरेन्टिनाविरुद्ध २–१ को अग्रता बनाएको थियो । यही अग्रता खेलको अन्तिमसम्म रहँदा इन्टरले नवौं पटक कोपा इटालियाको उपाधि उचाल्यो । यसअघि २०२१–२२ को सिजन पनि यो उपाधि इन्टरले नै जितेको थियो ।

इन्टरको जितमा दुई गोल गरेका मार्टिनेजले सबैखाले प्रतियोगितामा गरी यो सिजन २७ गोल पुर्याएका छन् । इन्टरमा उनको यो अहिलेसम्मकै उत्कृष्ट प्रदर्शन हो । उनले अझै फिफा विश्वकप र कोपा इटालियाको उपाधिसँगै च्याम्पियन्स लिगको उपाधि पनि जित्ने सम्भावना छ ।

१३ वर्षपछि च्याम्पियन्स लिगको फाइनलमा प्रवेश गरेको इन्टरले जुन ११ मा इस्तानबुलमा उपाधिका लागि म्यानचेस्टर सिटीसँग खेल्नेछ ।

योसँगै इन्टरले रोमासँग नौ पटक उपाधि जितेको रेकर्डसँग बराबरी गरेको छ । यी दुई क्लबभन्दा अघि रहेको युभेन्टसले हालसम्म १४ पटक यो उपाधि जितेको छ ।

अब इन्टरले शनिबार सान सिरोमा हुने एटलान्टाविरुद्ध जित निकाल्न सके इटालियन सिरी ए मा शीर्ष चारमा स्थान सुरक्षित गर्नेछ । सोही दिन फियोरेन्टिनाले रोमालाई आतिथ्यता प्रदान गर्नेछ ।