विराटनगर । विराटनगर–९ स्थित धरणीधर बहुमुखी सहकारी संस्थाले आर्थिक समस्याका कारण रकम फिर्ता नगरेपछि बचतकर्ताले सहकारीबाट सामान बोकेर हिँडेका छन् ।
सहकारीमा तीनहजार ५ सयभन्दा धेरै बचतकर्ताको दुई करोड ५० लाख रुपैयाँ बचत छ । तर, सहकारी संकटमा परेसँगै बचत फिर्ता माग्ने बचतकर्ताको भिड हुन थालेको थियो ।
सूचना टाँस गरी कार्यालय बन्द गर्ने र रकम फिर्ता गर्न समय माग्ने गरे पनि बुधबार बचतकर्ताको ठूलो समूहले कार्यालय घेराउ गरी सहकारीका सामान उठाएर हिँडेका हुन् ।
आफूले स्थानीय हाटबजारमा आलुचप र नास्ता बेचेर कमाएको दुई लाख रुपैयाँ जम्मा गरे पनि फिर्ता नपाएको विराटनगर पोखरियाकी पूर्णिमा भुजेलले बताइन् ।
“आज फिर्ता दिन्छु, भोलि फिर्ता दिन्छु भन्छन् । तर, कयौँपटक आउँदा पनि रित्तै हात फर्काउने गरेका छन्,” उनले भनिन्, “हामीले थोरै बचाएर गरेको बचत सहकारीले खाइदियो ।”
सहकारीमा बचतकर्ताले घेराउ गर्ने र सरसामान नै लग्न थालेपछि बुधबारदेखि प्रहरी खटिएर सुरक्षा दिन थालेको छ ।
सहकारीका अध्यक्ष रामबहादुर घिमिरेले बचतकर्तालाई क्रमशः रकम फिर्ता दिने तालिका बनाए पनि एकैपटक धेरैजना आउँदा दिन नसकिएको दाबी गरे । उनले बुधबार आएका बचतकर्तालाई रकम फिर्ता नदिने नभनेको तर नियमविपरीत सरसामान लुट्ने शैलीमा लग्नेहरूविरुद्ध कानुनी कारबाहीमा जाने भनेपछि सहकारीमा बचतकर्ताले नाराबाजी गरेका थिए ।
अध्यक्ष घिमिरेले राष्ट्रिय सहकारी बैंकले पैसा रिलिज नदिँदा बचत फिर्ता गर्न समस्या भएको बताए । सहकारीका प्रबन्धक लोचन राईले ३५ लाख रुपैयाँ भन्दा बढी रकम हिनामिना गरेको उनको आरोप छ ।
आक्रोशित बचतकर्ताले सहीछाप गरेर कम्प्युटर, प्रिन्टर तथा केही टुलहरू लिएर हिँडेका थिए । मोरङको बेलबारी र ग्रामथान गाउँपालिकाको नेताचोकमा समेत कार्यालय रहेको यो सहकारीको सञ्चालक समितिको बैठकले बचतकर्ताको रकम फिर्ता गर्ने निर्णय गरेको थियो । विराटनगर–१० तीनटोलियाका बचतकर्ता लोकेन्द्र श्रेष्ठले आफूलाई बचत लिन बोलाउने तर फिर्ता नगर्ने गरेको सुनाए ।