जनकपुरधाम । मधेस प्रदेश सरकार विस्तारको लागि मंगलबार दिउँसो १ बजे नयाँ मन्त्रीहरुको शपथग्रहण कार्यक्रम राखिएको थियो । नेपाली कांग्रेस, नेकपा (एकीकृत समाजवादी) र लोसपा सरकारमा सहभागी हुने तयारी गरिएको थियो ।

तर, सत्तासाझेदार दलबीच भागबण्डा नमिलेपछि शपथग्रहण अन्योल बनेको छ । यसबीच, आजै दिउँसो ३ बजे कांग्रेसबाट दुई र नेकपा एसबाट एक मन्त्रीले शपथग्रहण गर्ने बताइएको छ ।

लोसपाले मधेसमा दुई मन्त्रालयमा दाबी गर्दै आएको छ । नेकपा (माओवादी केन्द्र)ले पनि थप एक मन्त्रालय माग्दै आएको छ । 

तर, सरकारको नेतृत्व गरिरहेको जसपा यी दुवै पार्टीलाई एक÷एक मन्त्रालय मात्रै दिने मानसायमा छ । सोही कारण माओवादीले सरकारबाट बाहिर हुने निर्णय गरेको छ । लोसपा पनि सरकारमा सहभागी नहुने अवस्थामा छ । अहिले लोसपा, जनमत र माओवादीका नेताहरु सरकारबारे उचित निर्णय लिनका लागि बैठकमा छन् । 

माओवादी केन्द्रले सरकारबाट बाहिरिने निर्णय गरिसकेको छ । माओवादी संसदीय दलका नेता भरतप्रसाद साहले आफ्नो पार्टीबाट उद्योग, पर्यटन तथा वनमन्त्री बनेकी सुनिता यादवलाई फिर्ता बोलाइसकेको जानकारी दिए ।