काठमाडौं । सामाजिक सञ्जालमार्फत आफूहरूको चरित्र हत्या गर्न खोजिएको भन्दै नर्सहरू आन्दोलित भएका छन् । विभिन्न बहानामा चरित्र हत्या गर्न खोजिएको, दमन गर्न खोजिएको भन्दै उनीहरूले सोमबार काठमाडौंको माइतीघरमा विरोध प्रदर्शन गरे ।

गएको वैशाख २८ गते चितवनको बीपी कोइराला मेमोरियल अस्पतालको आकस्मिक केयर युनिटमा खिचिएको नर्स–बिरामीबीचको भिडियो टिकटकमा सार्वजनिक भएको थियो । सोही विषयमा उनीहरू विरोधमा उत्रिएका हुन् ।

नर्सहरूले ‘कसैको चरित्र हत्या गर्न पाइँदैन’, ‘नर्सहरूमाथिको दमन आखिर कहिलेसम्म ?’, ‘के नर्सहरूमाथि अत्याचार गर्न पाइन्छ ?’, ‘नर्स क्षेत्रमा सुरक्षा प्रत्याभूति गरियोस्’ जस्ता नारा लेखिएका प्लेकार्ड प्रदर्शन गरेका थिए ।

सामाजिक सञ्जालमा नर्सहरूको चरित्र हत्या गर्ने भिडियो सार्वजनिक भएको र यसले पेसाकै बदनाम गर्न खोजिएको उनीहरूको गुनासो छ ।

यसैबीच, नेपाल नर्सिङ संघले विज्ञप्ति निकालेर सो घटनाको भर्त्सना गरेको छ । डिउटीमा रहेको नर्स र बिरामीबीचको कुराकानीलाई बिनाअनुमति सामाजिक सञ्जालमा अपलोड गरिएको र त्यसमा आएका प्रतिक्रियाप्रति संघले आपत्ति जनाएको छ  ।

घटनाको सत्यतथ्य नबुझी सतही रूपमा टिप्पणी गरिएको र त्यसले नर्सिङजस्तो संवेदनशील पेसामा आँच पुर्‍याएको संघको ठहर छ । घटनाको सत्यतथ्य पत्ता लगाई दोषीमाथि कारबाही गर्न संघले माग गरेको छ ।