विराटनगर । नेपाल राष्ट्रिय क्रिकेट टोलीका फिजियो ट्रेनर अब्दुल सत्तारको उपचारका लागि विराटनगरका औद्योगिक संस्थाले सात लाख रुपैयाँ सहयोग गरेका छन् । उनको उपचारका लागि थप सहयोग जुटाउन राष्ट्रिय खेलाडीले विराटनगरमा ब्याट लिलामी समेत गरेका छन् ।

एसिया कप प्रतियोगितमा छनोट भएका टिमका खेलाडीलाई सम्मान गर्न बुधबार राति विराटनगरमा आयोजित कार्यक्रममा प्रशिक्षक मोन्टी देसाई, कप्तान रोहितकुमार पौडेल र विनोद दासलाई सहयोग रकम हस्तान्तरण गरिएको थियो ।

खेलाडीलाई सम्मान गरेका नेपाल उद्योग वाणिज्य महासंघ कोसी प्रदेश, उद्योग संगठन मोरङ र मोरङ व्यापार संघले उपचारका लागि सहयोग रकम जुटाएका हुन् ।

सत्तारको उपचारका लागि खेलाडीको हस्ताक्षरसहितको मायाको चिनो क्रिकेट ब्याट लिलामी गरिएको छ । विराटनगरका उद्योगी अमित राठीले एक लाख ५१ हजार रुपैयाँमा उक्त ब्याट खरिद गरेका छन् ।

सत्तार केही समयदेखि बिरामी भई हाल उपचाररत छन् ।

राष्ट्रिय टोलीका म्यानेजर विनोद दासले खेलाडी भएर जीविकापोर्जन गर्न समस्या हुने गरेको दृष्टान्त प्रस्तुत गर्दै भने, “यहाँ राजनीति गर्दै नेता भएर अघि बढ्न सकिन्छ । तर, नेताले खेलाडीलाई सक्दो सहयोग गर्नु हुन्न । हामीले देशको लागि खेल्ने हो । देशले हाम्रोबारे सोच्नुपर्‍यो ।”

क्रिकेट खेलाडी पारस लुनियाले खेलाडीलाई बाँच्ने आधार बनाउन सरकार गम्भीर बन्नुपर्ने बताए । “खेल खेलेरै जीवन धान्न सकियोस् । बिरामी पर्दा उपचार गर्न सकियोस्,” लुनियाले भने ।

एसीसी प्रिमियर कपको विजेता भएपछि क्रिकेट खेलाडीलाई विराटनगर बोलाई नगर परिक्रमा र सम्मान गरिएको हो । दिउँसो नगर परिक्रमपछि बुधबार राति रात्रिभोजसहित खेलाडीलाई सम्मान गरिएको थियो ।

कोसी प्रदेशका मुख्यमन्त्री हिक्मत कार्की र प्रदेशका मन्त्रीहरूले खेलाडीले देशको गौरव बढाएको भन्दै प्रशंसा गरे । त्यस अवसरमा युवा खेलाडी दिपेश कँडेललाई अरिहन्त समूहले अलग्गै थप सम्मान गरेको थियो ।

मुख्यमन्त्री कार्कीले धेरै लामो समयदेखि अपुरो रहेको विराटनगरको बैजनाथपुर खेल मैदानमा अन्तर्राष्ट्रियस्तरको क्रिकेट मैदान बनाउने बताए । आउँदो तीन वर्षभित्र क्रिकेट मैदान बनाइसक्ने उनको भनाइ छ ।

“यही आर्थिक वर्षदेखि काम सुरु भई तीन वर्षभित्र अन्तर्राष्ट्रियस्तरको क्रिकेट मैदान निर्माण गरिसक्नेछौँ,” उनले भने, “यसको सबै बजेट र निर्माणको काम प्रदेश सरकारले गर्नेछ ।”

मैदान निर्माणमा प्रदेश सरकारले स्थानीय र केन्द्रीय सरकारसँग पनि समन्वय गर्ने मुख्यमन्त्री कार्कीले सुनाए ।

मुख्यमन्त्री कार्कीले खेलाडीलाई प्रदेश सरकारले सहयोग गर्ने बाचा गरे । “भारत, पाकिस्तानविरुद्ध सगरमाथाको झौ छाती फुकाएर खेल्नुहोला । कोसी प्रदेश सरकारले खेलाडी खेलका लागि के कस्तो सहयोग गर्नुपर्ने सुरुआतबाट तयार छ,” उनले भने ।

त्यस अवसरमा नेपाल उद्योग वाणिज्य संघ कोसी प्रदेशका अध्यक्ष राजेन्द्र राउत, मोरङ व्यापार संघका अध्यक्ष नवीन रिजाल र उद्योग संगठन मोरङका अध्यक्ष सुयष प्याकुरेलले खेल र खेल मैदानको विकासका लागि सहयोग गर्न निजी क्षेत्र तयार रहेको बताएका थिए ।