काठमाडौं । अर्जेन्टिनाका कप्तान लियोनल मेसीले लाउरेसको वर्ष खेलाडी– २०२२ चुनिएका छन् । टेनिसका राफेल नाडाल, फुटबलकै काइलियन एमबाप्पे र बास्केटबलका स्टेफेन करीलाई पछि पार्दै मेसी लाउरेसको वर्ष खेलाडी चुनिएका हुन् ।

फ्रेन्च क्लब पेरिस सेन्ट जर्मन (पीएसजी)का ३५ वर्षीय फरवार्ड मेसीले खेलकुदको ओस्कार मानिने लाउरेस अवार्ड दोस्रोपटक जितेका हुन् । यो अवार्ड मेसीले सन् २०२० मा पहिलोपटक जितेका थिए । त्यस बेला मेसी फर्मुला वानका लेविस हेमिटनसँगै संयुक्त रूपमा वर्ष खेलाडी चुनिएका थिए ।

पेरिसको पभिलोन भेन्डोममा आयोजित अवार्ड समारोहमा मेसी श्रीमती एन्टेनोलासँगै पुगेका थिए । गत वर्ष यो अवार्ड फर्मुला वानका म्याक्स भस्र्टाप्पेनले जितेका थिए ।

लाउरेस अवार्डमा मेसीकै कप्तानीमा रहेको अर्जेन्टिना २०२२ को उत्कृष्ट टिम चुनियो । स्पेनिस फुटबल क्लब रियाल मड्रिड र अमेरिकी बास्केटबल क्लब गोल्डेन स्टेट वारियर्सलाई पछि पार्दै अर्जेन्टिना वर्षको उत्कृष्ट टिम चुनिएको हो ।

अर्जेन्टिनाले गत वर्ष कतारमा सम्पन्न फिफा विश्वकपको उपाधि जितेको थियो । अर्जेन्टिनाले फाइनलमा फ्रान्सलाई पेनाल्टी सुटआउटमा पराजित गर्दै तेस्रोपटक विश्वकपको उपाधि उचालेको थियो ।