काठमाडौं । फ्रान्सेली अटोमोबाइल ब्रान्ड सिट्रोनको सी३ मोडल सांग्रिला मोटर्सले नेपालमा सार्वजनिक गरेको छ । बुधबार काठमाडौंमा आयोजित एक कार्यक्रममा सिट्रोन सी३ सार्वजनिक गरिएको हो ।

सांग्रिला मोटर्सका प्रबन्ध निर्देशक हेमन्त गोल्छा र सिट्रोनका लागि आसियान ग्रुप डिस्ट्रिब्युटरको ग्राहक अनुभव निर्देशक नादिया कामरुदिनले सिट्रोन सी३को अनावरण गरेका हुन् ।

कार्यक्रममा बोल्दै प्रबन्ध निर्देशक गोल्छाले एक शताब्दीभन्दा लामो इतिहास बोकेको सिट्रोनको कार डिजाइन, कम्फर्टेबल र सस्पेसनका लागि उत्कृष्ट भएको बताए । उनले सिट्रोनको सी३ प्रतिस्पर्धी मूल्यमा बजारमा उपलब्ध गराएको बताएका छन् ।

सिट्रोन सी३ को सुरुवाती बेसिक भेरियन्टको मूल्य ३४ लाख ४९ हजार रुपैयाँ रहेको उनले बताए । यस्तै यसको अपर भेरियन्टको मूल्य ३६ लाख ४९ हजार रहेको उनले बताएका छन् ।

सिट्रोनको भारतमा उत्पादित नेपालका लागि उत्कृष्ठ मोडल नेपाल भित्र्याएको उनको भनाइ छ । सिट्रोनका लागि आसियान ग्रुप डिस्ट्रिब्युटरको ग्राहक अनुभव निर्देशक नादियाले नेपालका लागि सिट्रोन सी३ उत्कृष्ठ भएको बताएकी छन् ।

११ सय ९८ सीसी पेट्रोल इन्जिनको गाडीले ५ हजार ७५० आरपीएममा ८२ पीएस पावर र ३ हजार ७५० आरपीएममा ११५ एनएम टर्क जेनेरेट गर्छ । गाडीले प्रतिलिटर १९ किलोमिटरसम्म माइलेज दिने कम्पनीले जनाएको छ ।

३० लिटरको इन्धन ट्याङ्की रहेको गाडीको लम्बाई ३ हजार ९८१ एमएम, चौडाई १ हजार ७३३ एमएम, उचाई १५ सय ८६ र ह्विलबेस २ हजार ५४० रहेको छ । गाडीको बुट स्पेश ३१५ रहेको छ भने कुल तौल १३८२ किलोग्राम रहेको छ ।