विराटनगर । संघीय अर्थमन्त्री डा. प्रकाशशरण महत प्रमुख अतिथि रहेको एक कार्यक्रममा विराटनगरका एक होटेल व्यवसायीले गालीगलौज शैलीमा डा. गोविन्द केसीलाई ‘डाँका’ भन्दै दुर्वाच्य बोलेका छन् ।

अर्थ मन्त्रालय, राजस्व परामर्श समितिको आयोजना तथा उद्योग संगठन मोरङ र मोरङ व्यापार संघको सहजीकरणमा बिहीवार विराटनगरमा भएको कार्यक्रममा स्थानीय एसिया टिक होटेलका सञ्चालक पुण्य भट्टराईले डा. केसीलाई ‘डाँका’ भन्दै गाली गरेका हुन् ।

डा. केसीको आन्दोलनका कारण विराटनगरसहित देशभरमा नर्सिङ स्नातक पढाउने कलेज बन्द हुन पुगेको उनले दाबी गरे । भट्टराईले देशलाई आर्थिक रुपमा घाटा लगाउने काम गरेको भन्दै डा. केसीलाई ‘डाँका’ भएको भन्दै अपमान गरेका थिए।

भट्टराईले स्नातक पढाउने कलेजहरु बन्द हुँदा ठूलो आर्थिक नोक्सानी भएको जिकिर गरेका थिए । उनले डा.केसीप्रति  लक्षित गरी दुर्वाच्य प्रयोग गरेपछि कार्यक्रममा सहभागी उद्योगी व्यवसायीले मुखामुख गरेका थिए । 

आफू पर्यटन व्यवसायीसमेत भएको दाबी गर्ने भट्टराईले नर्सिङतर्फको पढाइ, त्यसबाट हुने आर्थिक गतिविधि डा. केसीकै कारण ध्वस्त भएको आरोप लगाए ।