काठमाडौं । सिनेमामा केही पात्रहरू यस्ता हुन्छन्, जसको अनुपस्थितिमा ती सिनेमा नै खल्लो प्रायः लाग्छन् । जो मुख्य पात्र होइनन् तर पनि सिनेमामा उनीहरूको भूमिका महत्त्वपूर्ण हुन्छ । 

उदाहरणका रूपमा केदार घिमिरे, विजय बराल, बुद्दि तामाङ, रविन्द्र झा आदिलाई लिन सकिन्छ । केदार घिमिरे आजसम्म चलचित्रको मुख्य भूमिकामा देखिएका छैनन् । उनी सहायक पात्रमा देखिन्छन् । तर, उनको भूमिका सिनेमामा सशक्त हुन्छ । 

‘छक्का पञ्जा’ सिरिज होस् वा ‘छ माया छपक्कै’ केदार दीपकराज गिरी मुख्य भूमिकामा रहेको चलचित्रमा सहायक पात्रका रूपमा देखिन्छन् । केदारविनाको ‘छक्का पञ्जा’ सिरिज कस्तो होला ? 

चलचित्र बन्छ, राम्रै पनि होला । तर, सत्य यो हो ‘छक्का पञ्जा’को ‘टेस्ट’मा असर भने निश्चय नै पर्छ । त्यसैले त दीपकराजले आजसम्म केदारलाई लिन छोडेका छैनन् । त्यसैले त केदारप्रति उनकै सहकर्मी जितु नेपालले टिप्पणी गर्दै आएका छन्– केदारजी आफू दुई नम्बरमा बस्ने र एक नम्बरको मान्छेलाई आफू वरिपरि घुमाइरहने क्षमता भएको व्यक्ति हो । 

केदारविनाको ‘छक्का पञ्जा’ धेरैले कल्पना पनि गर्दैनन् । उनी यो सिरिजको 'ब्याककबोन' नै हुन् । 

बुद्दि तामाङ पनि त्यस्तै पात्र हुन्, जसको अभावमा धेरै चलचित्र अपुरो/अधुरो लाग्छ । उनीविना सिनेमाको हिरो आधा/आधा लाग्छ । ‘छक्का पञ्जा’ र ‘कबड्डी’ यसको उदाहरण हुन् । ‘छक्का पञ्जा’को राजा होस् वा ‘कबड्डी’ सिरिजको काजी बुद्दिविना अपुरो लाग्छ । कारण अब राजा र काजीको चरित्रसँग उनी आएनन् भने दर्शकले खल्लो महसुस गर्ने अवस्था आइसकेको छ । 

यस्तै, आफू दुई नम्बरमा बसेर एक नम्बरको नायकलाई सफल र सवल बनाउने कलाकार हुन्, विजय बराल । उनी, ‘कबड्डी’ बिकेको पात्रका रूपमा काजीको साथी र छिमेकीको भूमिकामा हुन्छन् । उनीविना पनि अब ‘कबड्डी’ अधुरो लाग्ने भएको छ । हिरो त होइनन् उनी तर ‘कबड्डी’को महत्त्वपूर्ण अंग बनिसकेका छन्, विजय । 

‘कबड्डी’मा मात्रै होइन विजय दयाहाङसँग अरू चलचित्रमा पनि देखिन्छन् । जस्तै: अहिले प्रदर्शनरत चलचित्र ‘जारी’मा पनि दयाहाङ राई मुख्य भूमिकामा छन् भने विजय उनको छिमेकी र साथीको भूमिकामा । ‘जारी’मा पनि विजय दयाहाङको ‘ब्याकबोन’का रूपमा देखिएका छन् ।

त्यसो त विजय आफैँमा राम्रो अभिनय गर्ने कलाकार हुन् । अभिनयका लागि उनले कसैको दौराको फेसर समाइरहनु पर्दैन । तर, दयाहाङसँग उनको केमेस्ट्री गज्जबले मिलेको छ । त्यसैले उनीहरू धेरै चलचित्रमा सँगै देखिने गरेका छन् । सम्भवत: अझै केही वर्ष उनीहरूको जोडी मेकरको रोजाइमा पर्नेछ । 

केही समय अगाडि ‘ह्यारी की प्यारी’मा मुख्य भूमिकामा जितु नेपाल थिए । सहायक भूमिकामा काकाको चरित्रमा विजय बराल थिए । उनको अभिनय गज्जब थियो । सञ्चार माध्यममा तारिफ पनि भएको थियो । अहिले ‘जारी’मा पनि विजयको गज्जबको अभिनय छ । जसको चौतर्फी तारिफ पनि भइरहेको छ ।

विजय रंगमञ्चको बाटो हुँदै चलचित्रमा आएका कलाकार हुन् । मण्डला थिएटरबाट उनी कला क्षेत्रमा आएका हुन् । 

मण्डला थिएटरमा विजय र दयाहाङ सेयरहोल्डर पनि हुन् । बुद्दि पनि मण्डला थिएटरबाट कला क्षेत्रमा आएका हुन् । उनी पनि मण्डला थिएटरका सेयरहोल्डर हुन् । 

नायकको वरिपरि रहेर पनि आफूलाई अब्बल कलाकारको दर्जामा दर्ज गराउन सफल कलाकार रवीन्द्र झा पनि हुन् । धेरै चलचित्रमा उनलाई सहायक भूमिकामा देख्न सकिन्छ । तर, उनी रुचाइएका चरित्र हुन् । 

‘जात्रा’ सिरिजमा मुख्य भूमिकामा विपीन कार्की छन् । तर, यसमा मुन्नाको भूमिकामा देखिने रवीन्द्रविनाको यो सिनेमा कस्तो होला ? स्पष्ट छ, अधुरो । ‘जात्रा’लाई पूर्ण बनाउन पनि उनी यसका लागि निसन्देह आवश्यक पात्र हुन् ।