रोल्पा । रोल्पा समेन्ट उद्योग प्रालिको विद्युत् लाइन काटिएको छ । उद्योगले विद्युत् महसुलबापत आठ करोड ४४ लाख ६९७ रुपैयाँ बक्यौता बुझाउन बाँकी रहेको भन्दै विद्युत् लाइन काटिएको हो ।

रोल्पाको त्रिवेणी गाउँपालिका–३, बुढागाउँमा सञ्चालित उक्त उद्योगले बक्यौता नबुझाएको पाइएपछि लाइन काटिएको नेपाल विद्युत् प्राधिकरण विद्युत् वितरण केन्द्र रोल्पाले जनाएको छ ।

“पटक–पटक ताकेता गर्दा पनि अटेर गरी महसुल नबुझाएपछि आइतबार लाइन काट्न बाध्य भयौँ,” वितरण केन्द्रका कार्यालय प्रमुख आषेश्वर साहले भने ।

सिमेन्ट उद्यागेले २०७० सालयता महसुल नबुझाएको रोल्पा वितरण केन्द्रले जनाएको छ । बक्यौता नतिरेसम्म लाइन पुनः जडान नहुने उनको भनाइ छ ।

रोल्पा सिमेन्ट प्रालि रोल्पामा सञ्चालित सबैभन्दा ठूलो उद्योग हो । रासस