जनकपुरधाम । मधेस प्रदेशमा दोस्रोपटक मन्त्रिपरिषद् बिस्तार भएको छ । शुक्रबार ६ मन्त्री र तीन राज्यमन्त्रीले पद तथा गोपनीयताको शपथग्रहण गरेका छन् । १० वटा मन्त्रालयमध्ये नौवटाको बाँडफाँट भइसकेको छ । तीन राज्यमन्त्रीको जिम्मेवारी पनि तय भइसकेको छ ।  

तर, मन्त्रिपरिषद्मा दलितको सहभागिता शून्य देखिएको छ भने महिलाको न्यून सहभागिता छ । मधेस प्रदेशमा १८ प्रतिशत जनसंख्या रहेको दलितबाट यसअघिको सरकारमा पनि सहभागी गराइएको थिएनन् । यसअघि, केही समय तत्कालीन राजपाबाट सुरेश मण्डललाई उद्योग पर्यटन तथा वन राज्यमन्त्रीको जिम्मेवारी दिइएको थियो ।

प्रदेशमा १२ प्रतिशत जनसंख्या रहेको मुस्लिम समुदायबाट भने यसपटक एक मन्त्री र एक राज्यमन्त्री मात्रै बनाइएको छ । नेकपा (एमाले)बाट महिला, बालबालिका, युवा तथा खेलकुदमन्त्री पदमा मोहमद जैद आलम र जनता समाजवादी पार्टी (जसपा)बाट सामाजिक विकास राज्यमन्त्री शेख अबदुल कलाम अजादलाई बनाइएको छ । 

प्रदेशसभामा ३९ जना महिला सांसद भए पनि एक महिलालाई मात्रै मन्त्री बनाइएको छ । जसपाबाट सामाजिक विकासमन्त्री सुरिता साह बनेकी छन् । उनलाई लोसपाले टिकट नदिँदा स्वतन्त्र जितेर जसपा प्रवेश गरेकी थिइन् । अहिले मन्त्री बनेकी छन् । यसअघिको सरकारमा मन्त्रिपरिषद्मा महिलालाई सहभागी गराइएको थिएन । राज्यमन्त्री भने बनाइएको थियो । 

माओवादी पुरानै अडानमा

मधेस सरकारमा १० वटा मन्त्रालय छन् । जसमध्ये नौ मन्त्रालयको जिम्मेवारी सत्तासाझेदार दलहरुले बाँडफाँट गरिसकेका छन् । अब मुख्यमन्त्री मातहतमा उद्योग पर्यटन तथा वन मन्त्रालय मात्रै बाँकी छ । केन्द्रीय सरकारको नेतृत्व गरिरहेको नेकपा (माओवादी केन्द्र)ले सरकारमा सहभागिता जनाएको छैन । माओवादीले दुई मन्त्रालय माग गर्दा सत्तासाझेदार दलबीच सहमति हुन सकेको छैन । 

सत्तासाझेदार दलहरुले माओवादीलाई एक मन्त्री र एक राज्यमन्त्री दिन तयार भए पनि माओवादी दुईवटा मन्त्रालयमा दाबी गरिरहेको छ । माओवादीभित्र पनि मन्त्री बन्ने विवाद रहेको कारण सरकारमा सहभागी नभएको बुझिएको छ ।

कुन दलबाट को बने मन्त्री ?

एमालेबाट तीन मन्त्री र एक राज्य मन्त्रीले शपथ लिए । गृह तथा सञ्चारमन्त्रीमा शत्रुधन प्रसाद सिंह, कानुनमन्त्रीमा राजकुमार लेखी, महिला बालिकालिकामन्त्री मोहम्मद जयद आलम र गृह तथा सञ्चार राज्यमन्त्री पदमा केशव रायले शपथ लिएका हुन् । यसअघि, एमालेबाट सरोज यादवले भौतिक पूर्वाधार तथा विकासमन्त्रीको जिम्मेवारी पाइसकेका छन् ।

जसपाबाट दुई मन्त्री र एक राज्यमन्त्रीले शपथग्रहण गरे । सामाजिक विकासमन्त्रीमा सुरिता साह, खानेपानी तथा ऊर्जा विकासमन्त्रीमा सिंगासन सा कलवार र सामाजिक विकास राज्यमन्त्रीमा शेख अबदुल कलाम मन्त्री बनेका छन् । यसअघि, जसपाका सञ्जय यादवले अर्थ मन्त्रालयको जिम्मेवारी पाइसकेका छन् । 

जनमत पार्टीबाट एक मन्त्री र एक राज्यमन्त्रीले शपथ लिए । संसदीय दलको नेतासमेत रहेका महेशप्रसाद यादवले शिक्षा, विज्ञान, प्रविधि तथा वाणिज्यमन्त्री र भूमि व्यवस्था तथा कृषि सहकारी राज्यमन्त्री पदमा सञ्जय यादवले शपथ लिए । जनमत पार्टीबाट यसअघि भूमि व्यवस्था तथा कृषि सहकारीमन्त्रीको जिम्मेवारीमा इन्जिनियर बसन्त कुशवाहा छन् । 

शपथग्रहण गरेका मन्त्रीहरुको नाम मुख्यमन्त्री यादवले प्रदेश प्रमुखसमक्ष मन्त्री पदमा नियुक्त गर्न जिम्मेवारीसहित सिफारिस गरेका थिए । संविधानको धारा १६८ को उपधारा ९ बमोजिम मन्त्रिपरिषद् पुनर्गठन गरिएको हो । मुख्यमन्त्री यादवसँग तीन मन्त्रीले गत पुस २९ गते शपथ लिएका थिए ।