पोखरा । कास्कीको मादी गाउँपालिका–६ तप्राङका कृष्ण क्षेत्री पोखरा–१३ काहुँखोला नजिकै स्टेसनरी पसल चलाउँथे । ‘तप्राङ स्टेशनरी’ चलाउन थालेको एक दशकभन्दा बढी भइसकेको छ । श्रीमती शिक्षिका हुन् । उनी दुई छोरी र एक छोराका बुवा हुन् ।

उनै क्षेत्रीले आइतबार एकाबिहानै आफ्नै शरीरमा पेट्रोल छर्केर आगो लगाए । तर, शरीरमा त्यति क्षति भएको छैन । उनी राम्रैसँग बोल्न सक्छन् । तर, उनको शरीरमा लागेको आगो निभाउन गएकी संगीता सापकोटाको भने स्थिति गम्भीर छ । जिल्ला प्रहरी कार्यालय कास्कीले दिएको जानकारी अनुसार सापकोटाको शरीर ९० प्रतिशतभन्दा बढी जलेको छ ।

क्षेत्रीको जन्मघर तप्राङ भएपनि उनी परिवारको साथमा सापकोटाको घरमा बहालमा बस्दै आएका थिए । लामो समयदेखि सोही घरमा बस्दै आएका क्षेत्री र सापकोटा परिवारको सम्बन्ध राम्रो थियो । उनीहरूबीच आत्मीयता थियो । तर, बिहान क्षेत्रीले आफ्नै शरीरमा आगो लगाएपछि घरबेटी सापकोटा उनलाई जोगाउन भन्दै गएकी थिइन् ।

उनको पनि शरीरमा पेट्रोलका छिर्काहरू परे । शिरदेखि पाउसम्म लगाएका उनका कपडालाई पेट्रोलको गन्ध पाउनासाथ आगोको लप्काले भेटिहाल्यो । गुहार माग्दै गरेकी सापकोटाको शरीरको आगो नियन्त्रणमा लिएर स्थानीयले पश्चिमाञ्चल क्षेत्रीय अस्पतालमा लगेका छन्, जहाँ उनको स्थिति गम्भीर छ, उपचार चलिरहेको छ ।

जागिरे श्रीमती, आफू पनि व्यवसाय सञ्चालन गर्दागर्दै कृष्ण किन आफ्नै शरीरमा पेट्रोल छर्केर आगो लगाउन पुगे त ?
अस्पतालमा उपचाररत कृष्णलाई उद्दृत गर्दै एक प्रहरीले भने, “साथीकोबाट शनिबार एक लिटर पेट्रोल लिएर आउनुभएको रहेछ । पुस्तक पसल चलाउनुभएको, तर पछिल्लो समय व्यापार नहुँदा तनाव र व्यवहार डुब्दै गएपछि आत्मदाहको निर्णयमा पुग्नुभएको रहेछ ।”

प्रहरीले घटनाबारे विभिन्न कोणबाट अनुसन्धान गरिरहेको छ ।

अस्पताल प्रांगणमा भेटिएका उनका दाइले भने भाइको कुनै व्यवहारबारे आफूलाई जानकारी नभएको बताए । शरीरमा आगो लगाएपछि उनलाई जोगाउन गएका सोही ठाउँका अन्य व्यक्तिले पनि व्यवहारिक समस्याबारे आफू जानकार नरहेको बताएका छन् । 

पोखरा–१३ मा नै रामचन्द्र सापकोटाको पनि व्यवसाय छ । कृष्णसँग उनको पहिल्यैदेखिको चिनजान छ । आइतबार बिहान पनि उनी सदाझैँ बिहान पौने ६ बजे नै पसल खोल्न गएका थिए ।

घटनाबारे उनी भन्छन्–

मैले यो पसल पौने ६ बजे खोलेको थिएँ । सामान मिलाउँदा र सफाइ गर्दा सवा ६ बजेको थियो । ठूलो स्वरमा महिला चिच्याएको आवाज आयो । त्यो आवाज म भन्दा पारीको घरमा थियो । आगो रन्किएको र ज्वाला देखेँ । चेनल गेट लगाइएको थियो । जाली बन्द रहेछ । महिलाले गुहार भनेपछि म गएँ । उभिएको शरीरमा आगो लागिरहेको थियो । लात्ताले हानेर ढोका खोली भित्र गयौँ । त्यहाँ आगो निभाउने केही पाएनौँ । म भान्सामा छिरेँ, त्यहाँ भएका चारपाँच बोतलमा पानी रहेछ, लगेर छम्कियौँ । शरीर भुइँमा ढलिसकेको थियो । आगो निभाइसकेपछि म ट्याक्सी खोज्न निस्केँ । नजिकै थिएनन्, माथि चोकमा गएर ट्याक्सी लिएर आएँ । भित्र दुईजना हुनुहुँदो रहेछ । दुवैजना बाहिर हिँडेर आउनुभयो । हामीले अस्पताल लग्यौँ । झ्याल ढोकाको खाप जलेका छन् ।

पारिवारिक कुरा केही होला, बाहिर अन्य व्यवहार भएको हामीलाई थाहा छैन । तप्राङ स्टेसनरी चलाउनुहुन्थ्यो । लामो समयदेखि । उहाँको परिवार राम्रो छ । श्रीमतीको पनि जागिर छ ।

अर्का व्यवसायी बुद्धिबहादुर सापकोटा पनि रामचन्द्रसँगै उनीहरूको उद्धार गर्न गएका थिए ।

उनी भन्छन्– 

भर्खर सटर खोलेर बढार्छु भनेर लागेको थिएँ । आवाज आयो । म त्यतै लागेँ । शरीरमा आगो दन्किरहेको थियो । हामी (रामचन्द्रसहित) भित्र पुग्दानपुग्दै संगीताको शरीर ढल्यो । मैले कपडा ल्याएर छोपेँ । हामीले पानी हाल्यौँ र आगो नियन्त्रणमा लियौँ । दाइ ट्याक्सी खोज्न जानुभयो । भित्र बाथरुममा अर्को दाई (कृष्ण) पनि हुनुहुँदो रहेछ । उहाँको हात खुट्टा र अनुहार जलेको देखेका थियौँ । पानी, पानी भन्दै हुनुहुन्थ्यो । शरीरमा कपडा थिएन । मैले पछ्यौरा बेर्न लगाएर अस्पताल पठाएको हुँ । आगो कसरी लाग्यो हामीलाई थाहा भएन ।

बिहान ६ बजेको उक्त घटनापछि अहिले उनीहरूका आफन्तहरू सबै पश्चिमाञ्चल क्षेत्रीय अस्पतालको परिसर बाहिर छन् । प्रहरीले पनि घटनालाई नजिकबाट नियालिरहेको जनाएको छ ।

जिल्ला प्रहरी कार्यालय कास्कीका निमित्त सूचना अधिकारी सुवास तिमिल्सिनाले साप्कोटाको अवस्था गम्भीर भएको बताए । उनका अनुसार क्षेत्रीले आफूले आत्महत्या गर्दा संगीता बचाउन आएको बयान दिएका थिए ।

“पुरुषले म डिप्रेसनमा थिएँ । उहाँ (संगीता)ले मलाई बचाउन आउँदा उल्टै जल्नुभएको हो भनेका छन्,” कृष्णको भनाइ उद्धृत गर्दै उनले भने, “हामीले अहिलेसम्म आत्मदाह प्रयास नै बुझेका छौँ । तर अनुसन्धान भने हुनेछ ।”

उनले घटनाको बारेमा विभिन्न दृष्टिकोणबाट अनुसन्धान हुने बताए । “विभिन्न कोणबाट अनुसन्धान गर्छौं । उनीहरूको पारिवारिक सम्बन्ध, घटनास्थललगायत विविध कुराहरू छन् । अनुसन्धान भन्दा पहिलो प्राथमिकता भनेको दुवैको ज्यान जोगाउनु हो । घाइतेहरूको उपचारलाई प्राथमिकता दिनुपर्छ बाँकी अनुसन्धानका पाटाहरू हुन्छन,” उनले भने ।

संगीताका श्रीमानले भने घटना हुँदा आफू मर्निङवाक गएको बताएका छन् । आफू बाहिर निस्केको १० मिनेटमा नै घटना घटेको उनले बताए ।