काठमाडौं । काठमाडौंमा एक टिपर चालकले नक्कली आरोप स्वीकार गरेको पाइएको छ ।

गएको आइतबार राति ८ बजेतिर काठमाडौंको तारकेश्वर नगरपालिकास्थित चिसापानी सडकखण्डमा भएको दुर्घटनामा एकजनाको मृत्यु भएको थियो । नुवाकोटतर्फ जाँदै गरेको प्रदेश ३ बा ६१८९ नम्बरको मोटरसाइकलमा सवार २३ वर्षीय सविन फुँयालको मृत्यु भएको हो ।

सडकमा घाइते अवस्थामा भेटिएका उनलाई उपचारका लागि ग्रीनसिटी अस्पतालमा लगिएको थियो । काठमाडौं उपत्यका ट्राफिक प्रहरी कार्यालयका प्रवक्ता राजेन्द्रप्रसाद भट्टका अनुसार उपचारका क्रममा उनको सोही राति ११ बजे मृत्यु भएको हो ।

दुर्घटना गराएको भन्दै प्रहरीले बा४ख ९५४३ नम्बरको टिपरका चालक शिव बलामीलाई पक्राउ गरेको थियो । सुरुमा उनले आरोप स्वीकार गरेका थिए । तर, पछि आफूले टिपर नचलाएको बताएपश्चात् नक्कली चालक खडा गरिएको रहस्य खुलेको हो ।

घटनामा संलग्न रहेको आरोपमा टिपरका साहुलाई पनि प्रहरीले पक्राउ गरेको छ । टिपर चलाउनेसँग सवारी चालक अनुमतिपत्र नभएकाले कागजात भएका बलामीलाई आरोप स्वीकार गर्न लगाइएको हुन सक्ने आशंका गरिएको छ ।

घटनाबारे अनुसन्धान भइरहेको प्रहरी परिसर काठमाडौंका प्रवक्ता एसपी दिनेशराज मैनालीले बताए ।

आक्रोशित स्थानीयले सोमबार दिनभर सो क्षेत्रमा प्रदर्शन गरेका थिए । उनीहरूले प्रहरीको मोटरसाइकल समेत जलाए । मृतकका आफन्तले भने दुर्घटना नभई हत्या गरिएको दाबी गर्दै आएका छन् ।

यस्तो थियो घटना
आइतबार साँझ तारकेश्वर नगरपालिका–६ मा सविन आफ्ना चार साथीहरूसँग रहेको खुलेको छ । उनीहरू सबैले एक खाजा पसलमा बसेर मादकपदार्थ सेवन गरेको प्रारम्भिक अनुसन्धानबाट खुलेको हो ।

खानपानपछि तीन साथीहरू एकै मोटरसाइकलमा चढेर निस्किएका थिए । सविन आफैँले हाँकेर एक मोटरसाइकल चलाएका थिए ।

तीन साथीहरू अगाडि रहेको र सविन एक्लै हुँदा नआएपछि साथीहरूको समूह उनलाई खोज्न फर्किएको थियो । फर्कंदा तारकेश्वर–६ स्थित सडक किनारमा सविनलाई घाइते अवस्थामा देखेपछि उनलाई त्रिवि शिक्षण अस्पतालमा लगेका थिए । सोही क्रममा उनको ज्यान गएको हो ।

स्थानीयले प्रहरी वृत्त बालाजुले अनुसन्धानमा लापरबाही गरेको भन्दै दुर्घटना नभई हत्या भएको दाबी गरेका छन् । उनीहरूले प्रहरी कार्यालयमा जाहेरी नदिएको र जाहेरी दिएपछि अनुसन्धान अगाडि बढाउन सहज हुने एसपी मैनालीले बताए ।