जनकपुरधाम । संसदीय चुनावमा पार्टीबाट टिकट नपाएपछि पार्टी परित्याग गर्ने र परिवर्तन गर्ने नेता यसपटकको चुनावमा धेरै देखिए । मधेस प्रदेशमा पनि टिकट नपाएको तथा पाउने ग्यारेन्टीसहित पार्टी परिवर्तन गर्ने नेताहरुको सूची लामै बन्यो । तर, गत मंसिर ४ गते सम्पन्न प्रतिनिधि तथा प्रदेशसभा निर्वाचनमा पार्टी फेरेर उमेदवार बनेका सबैले सांसद भने बन्न पाएनन् । 

सांसद बन्नकै लागि जनता समाजवादी पार्टी त्याग गरेर महोत्तरीकी डा. रिना यादव नेकपा (एमाले) प्रवेश गरेकी थिइन् । चुनावको मुखमै गत असोज १ गते उनले एमाले अध्यक्ष केपी शर्मा ओलीको हातबाट टीका लगाएर एमाले प्रवेश गरकी थिइन् । 

रिनाले एमालेको समानुपातिक कोटामा सांसद बन्ने आश्वासन पाएकी थिइन् । एमालेको बन्द सूचीमा उनको नाम पनि राखिएको थियो । तर, उनी सांसद बन्न सकिनन् । उनी यसअघि तत्कालीन राजपाबाट समानुपातिक कोटामा सांसद बनेकी थिइन् । 

यस्तै, धनुषाको किसोरी साह (कमल) पनि पार्टी त्याग गरेका थिए । उमेदवारीको दिन उनले एमाले त्याग गर्दै धनुषा निर्वाचन क्षेत्र १ बाट डा. सीके राउत नेतृत्वको जनमत पार्टीबाट प्रतिनिधिसभामा उमेदवारी दिएका थिए । तर, उनी पराजित भए ।

साहलाई यसपालि एमालेले टिकट दिएन । यसअघि, उनी एमालेबाट नै धनुषा १ को ‘क’बाट प्रदेशसभामा निर्वाचित भएका थिए । मधेश प्रदेशसभामा उनी एमालेको प्रमुख सचेतकको भूमिकामा थिए । 

जसपा त्याग गरी लोसपाबाट उमेदवारी दिएका कौशलकुमार यादव पनि पराजित भए । उनी यसअघि उपेन्द्र यादव नेतृत्वको संघीय समाजवादी फोरमबाट सांसद थिए । पछि महन्थ ठाकुर नेतृत्वको राजपा र संघीय समाजवादी एकीकरण भई जसपा बनेको थियो । जसपाबाट महन्थ ठाकुरको नेतृत्वमा लोसपा गठन हुँदा यादवले पछि जसपा नै राजेका थिए । तर, चुनावको मुखमा उनले लोसपाबाट महोत्तरी निर्वाचन क्षेत्र नम्बर ४ को ‘ख’मा उमेदवारी दिएका थिए । उनलाई एमालेका सरोजकुमार यादवले पराजित गरेका छन् ।
 
जसपाकै नेतृ करिमा वेगमाले पनि पार्टी त्याग गरी स्वतन्त्र उमेदवारी दिएकी थिइन् । पर्सा निर्वाचन क्षेत्र २ को ‘ख’बाट स्वतन्त्र उमेदवारी दिएकी उनले सम्मानजनक मत पनि ल्याउन सकिनन् । यसअघि, उनी सोही क्षेत्रमा संघीय समाजवादी फोरमबाट निर्वाचित भएर सांसद भएकी थिइन् । 

मधेस प्रदेशका पूर्वउद्योग पर्यटन तथा वनमन्त्री पनि पराजित भएका छन् । सर्लाही निर्वाचन क्षेत्र २ बाट उनले जसपा त्याग गर्दै स्वतन्त्र उमेदवारी दिएका थिए । तर, उनी तीन हजार २५३ मत मात्रै ल्याउन सके । यसअघि उनी सोही क्षेत्रबाट तत्कालीन राजपाबाट निर्वाचित भएका थिए । 

पछि जसपाबाट अलग्गिएर लोसपा गठन हुँदा मन्त्री पद जोगाउन उनी जसपा नै रोजेका थिए । तर, जसपाले उनलाई गठबन्धनका कारण टिकेट दिएन । यहाँ एमाले–जसपा गठबन्धनबाट एमालेका किसुनदेव राय उमेदवार थिए । उनलाई पराजित गर्दै यहाँ जंगिलाल राय निर्वाचित भएका छन् ।

यस्तै, पूर्वसांसद जन्नत अन्सारी पनि पराजित भए । उनी पर्सा निर्वाचन क्षेत्र नम्बर १ को ‘क’बाट जसपा त्याग गर्दै स्वतन्त्र उमेदवार बनेका थिए । उनले एमाले–जसपा गठबन्धनको साझा उमेदवार विचारीप्रसाद यादवलाई अस्वीकार गर्दै स्वतन्त्र उमेदवारी दिएका थिए । यसअघि, उनी संघीय समाजवादी फोरमबाट सोही क्षेत्रमा निर्वाचित भएका थिए । 

यी सबै उमेदवारहरुलाई पार्टीले कारबाही पनि गरेका छन् । कतिपयले पार्टीकै आधिकारिक उमेदवारविरुद्ध उमेदवारी दिएका थिए भने कतिपयले पार्टीकै आन्तिरक सहमतिमा गठबन्धनका उमेदवारविरुद्ध खडा भएका थिए ।