जनकपुरधाम । मुरलीधर मिजार, कृष्णा कुमार महतो र ज्ञानु कुमार यादव कलाकारिता क्षेत्रका अब्बल नाम हुन् । कला, संगीतसँग जोडिएका उनीहरू मंसिर ४ को निर्वाचनमा उमेदवार बनेका छन् । 

मुरलीधर सिरहा निर्वाचन क्षेत्र नम्बर २ बाट राप्रपाका उमेदवार छन् । कृष्णा धनुषा ४ बाट प्रतिनिधिसभा सदस्य पदमा स्वतन्त्र उमेदवार छन् । ज्ञानकुमार सिरहा ३ को ‘ख’मा प्रदेशसभा सदस्य पदका लागि जनमत पार्टीबाट उमेदवार बनेका छन् । कलाको माध्यमबाट उठाएको मुद्दा कार्यान्वयनका लागि उमेदवारी दिएको उनीहरूको भनाइ छ । 

नेपालमा मात्रै होइन भारतमासमेत ख्याती कमाएको नाम हो, मुरलीधर । अहिले उनी चुनावी मैदानमा छन् । निर्वाचन क्षेत्रमा मत माग्नु उनको अहिलेको दैनिकी हो । ‘उडायो सपना सबै हुरीले...’ बोलको गीत उनको लोकप्रिय गीच हो । नेपाली र हिन्दीमात्र होइन मैथिली, भोजपुरी, पञ्जाबी, मराठी र गुजराती भाषामा उनले सयौँ गीत गाएका छन् । पछिल्लो समय उनी फिल्म लेख्न र निर्देशनमा सक्रिय छन् । 

उनी कलाका विभिन्न विधामा अब्बल छन् । तर, आसन्न निर्वाचनमा उनको जित सजिलो छैन । किनभने सिरहा निर्वाचन क्षेत्र २ बाट दुई पूर्वमन्त्री पनि चुनावी मैदानमा छन् । सत्ता गठबन्धनबाट नेपाली कांग्रेसकी चित्रलेखा यादव र एमाले–जसपा गठबन्धनका राजकिशोर यादवले उनको सामना गर्नुपर्नेछ । 

चित्रलेखा र राजकिशोर यस पटक बलियो उमेदवारको रुपमा चर्चामा छन् । उनीहरूको संगठन पनि मजबुत छ । तर, मुरलीधर चुनाव लडेको राप्रपाको न संगठन अब्बल छ, न  उनी जनतामा भिजेका छन् । त्यसैले मुरलीधरलाई चुनाव जित्न ठूलो चुनौती छ ।
 
मुरलीधर जस्तै चुनौती कृष्णाकुमार महतोलाई पनि छ । यहाँ पनि दुई पुर्वमन्त्रीबीच प्रतिस्पर्धा छ । स्थानीय टेलिभिजनबाट प्रसारण हुने उनको ‘रोचकघोचक’ कार्यक्रम निकै चर्चित छ । हास्य कलाकार कृष्णा मधेसका प्रायः गाउँमा स्टेज कार्यक्रम लिएर पुगेका छन् । जब उनी स्टेजमा चढ्छन् तब दर्शकको हुटिङ सुरु हुन्छ । हसाएर उनले हजारौँ दर्शकको मन जितेका छन् । तर, चुनावमा मतदाताको मन जित्न सफल होलान् कि असफल ? मंसिर ४ को नतिजा कुर्नैपर्छ ।

उनी उमेदवार बनेको क्षेत्रमा नेकपा एमाले सचिव रघुवीर महासेठ, नेपाली कांग्रेसका सहमहामन्त्री महेन्द्र यादव र जसपाका केन्द्रीय सदस्य महाजन यादव उमेदवार छन् । जनतामा परिर्वतनको चाहना रहेकाले आफूले जित्ने कृष्णाको दाबी छ । 

“प्रत्येक पटक यहाँ जनता दलका नेतालाई मत दिएर दिक्क बनेका छन् । पश्चताप मानिरहेका छन्,” उनी भन्छन्, “‘जनता परिर्वतन खोजिरहेका छन् । जनताको भावना अनुसार मेरो जित हुन सक्छ ।” 

युवा गायक ज्ञानु कुमार यादव पनि चुनावी मैदानमा खडा भएका अर्का कलाकार हुन् । उनलाई पनि जित निकाल्न सहज छैन । यहाँ पाँच दलीय गठबन्धनका प्रमोद कुमार यादव उमेदवार छन् । उनी प्रदेश कानुनमन्त्री तथा एकीकृत समाजवादी पार्टीका जिल्ला अध्यक्षसमेत हुन् । एमाले–जसपा गठबन्धनबाट रेणु कुमारी यादवको उमेदवारी परेको छ । 

रेणु यसअघि मधेस प्रदेशको सांसद भइसकेकी छन् । यहाँ गोपालप्रसाद यादव र सिरहा नगरपालिकाका मेयर नवीन यादवका भाइ प्रवीन यादवले स्वतन्त्र उमेदवारी दिएका छन् । यहाँ स्वतन्त्र उमेदवारको प्रभाव पनि उत्तिकै देखिएको छ ।