जनकपुरधाम । मंसिर ४ गते हुने प्रदेशसभा र प्रतिनिधिसभा निर्वाचनको उमेदवारलाई अहिले मतदाता भेट्न भ्याइनभ्याइ छ । चुनावी एजेण्डासहित उमेदवार अबेर रातिसम्म घर दैलोमा पुगिरहेका छन् । चुनावी आंकलन भइरहेको छ । जोड–घटाउ र जित/हारबारे जनताले आआफ्नो धारणा व्यक्त गरिरहेका छन् । यहाँ प्रमुख दुई पार्टीका पदाधिकारी उमेदवार छन् । 

तीन केन्द्रीय नेतासहित २९ जना उमेदवार प्रतिस्पर्धामा छन् । पाँच दलीय गठबन्धनबाट नेपाली कांग्रेसका सह–महामन्त्री महेन्द्र यादव, नेकपा एमालेका सचिव रघुवीर महासेठ र जनता समाजवादी पार्टी (जसपा)का केन्द्रीय सदस्य महाजन यादव प्रमुख दलका उमेदवार छन् । यी तीनै नेता ०७४ कै प्रतिस्पर्धी हुन् । यस पटक अन्य क्षेत्रमा एमाले–जसपा तालमेल भए पनि यी क्षेत्रमा हुन सकेन । 
 
एमालेका उमेदवार महासेठ पुनः जितेर दोहोरिने योजनामा छन् । कांग्रेसका सह–महामन्त्री यादव उनलाई हराउने कसरतमा छन् । जसपाका महाजन पनि दुवैलाई हराएर इतिहास बनाउन चाहन्छन् । यादव महासेठसँग ०७४ को बदला लिन एमालेका नेता तथा कार्यकर्ता कांग्रेसमा भित्र्याइरहेका छन् । उनले एमालेबाट समानुपातिकको लागि सिफारिस भएकी फुलकुमारी महतो र डा. सञ्जिव यादवलाई कांग्रेसमा ल्याए । त्यसअघि जसपा मधेस प्रदेश समिति वरिष्ठ उपाध्यक्ष शेषनारायण यादवलाई पार्टी भित्र्याएर प्रदेशसभातर्फ उमेदवार बनाइएको छ । 

महासेठ पनि आफ्नो जित कायम राख्न रणनीति तयार गरिरहेका छन् । महासेठले सोही क्षेत्रमा घर भएका कांग्रेस नेता सन्तोष यादवलाई एमालेमा प्रवेश गराएर प्रदेशसभामा उमेदवार बनाएका छन् । यी दुवै नेतालाई पराजित गर्न जसपाका महाजन यादव पनि कसरतमा छन् । ०७४ मा थोरै मतले तेस्रो स्थानको मत ल्याएका महाजन विगतभन्दा बलियो भएको सावित गर्न चाहन्छन् । मधेस प्रदेश सरकारको नेतृत्व गरी जसपाले यी क्षेत्रमा काम गरेका कारण उनी बलियो भएको जिकिर गर्छन् ।
 
जसपाबाट प्रतिनिधिसभामा यादव, प्रदेशसभातर्फ ‘क’ मा ज्ञानेन्द्र यादव र ‘ख’ मा चन्देश्वर महतो उमेदवार छन् । एमालेबाट प्रतिनिधिसभामा महासेठ, प्रदेशसभातर्फ ‘क’ मा सन्तोष यादव र ‘ख’मा हरिनारायण महतो उमेदवार छन् । पाँचदलीय गठबन्धनबाट प्रतिनिधिसभामा कांग्रेसका यादव, प्रदेशसभातर्फ ‘क’ मा कांग्रेसकै शेष नारायण यादव र ‘ख’ नेकपा एकीकृत समाजवादीका शत्रुधन महतो उमेदवार छन् । 

जोड–घटाउमा कांग्रेस बलियो 
०७४ को निर्वाचनमा महासेठ २२ हजार ५३२ मत ल्याएर विजयी भएका थिए । कांग्रेसका यादव १९ हजार ९८८ मत ल्याएर निकटतम प्रतिद्वन्द्वी बनेका थिए । उपेन्द्र यादव नेतृत्वको तत्कालीन संघीय समाजवादी पार्टी फोरमबाट महाजनले पनि १९ हजार ६६२ मत ल्याएका थिए । सो निर्वाचनमा एमाले र माओवादीबीच चुनावी तालमेल भएको थियो ।
 
माओवादीको मतसहित एमालेका महासेठ विजयी भएका थिए । मधेस आन्दोलनको रापताममै भएको निर्वाचनमा महाजनले पनि सम्मानजनक मत प्राप्त गरेका थिए । तर, यसपटकको परिस्थिति फरक छ । न आन्दोलनको महोल छ, न त एमाले माओवादीबीच चुनावी तालमेल नै । एमालेबाट वरिष्ठ नेता माधव कुमार नेपाल समूह पनि अलग्गिएको छ । यस्तो अवस्थामा महासेठ कमजोर देखिएको नेताहरूको विश्लेषण छ ।
 
स्थानीय निर्वाचनको मतपरिणाम अनुसार पनि कांग्रेस अगाडि देखिन्छ । ४२ वटा वडा रहेको यस क्षेत्रको १९ वटा वडामा कांग्रेस विजयी भएको छ । १२ वडामा एमाले विजयी भएको छ । पाँच पालिका रहेको यहाँ तीन पालिकामा कांग्रेस, एकमा एमाले र एक पालिकामा कांग्रेसकै वागी उमेदवार विजयी भएका छन् । 

यी क्षेत्रमा कांग्रेसले तीन उपप्रमुख पनि जितेको छ ।  यहाँ अहिले एक लाख १७ हजार १९५ मतदाता छन् ।