काठमाडौं । बलिङमा कुशल भुर्तेल चम्किएपछि मधेस प्रदेशमाथि मंगलबार १९२ रनको फराकिलो विजय हासिल गर्दै नेपाल पुलिस क्लब समूह ‘बी’को विजेताका रूपमा प्रधानमन्त्री कप एकदिवसीय क्रिकेट प्रतियोगिताको सेमिफाइनलमा पुगेको छ ।
समूह चरणका खेलमा शतप्रतिशत जित निकालेको पुलिसले चार खेलबाट आठ अंक जोड्यो । हारका बाबजुद उपविजेताका रूपमा सेमिफाइनलमा पुगेको मधेसले पाँच अंक जोड्यो ।
कीर्तिपुरस्थित त्रिवि क्रिकेट मैदानमा पुलिसले दिएको २७४ रनको लक्ष्य पछ्याएको मधेसले २९.२ ओभरमा सबै विकेट गुमाएर ८२ रन मात्र बनाउन सक्यो ।
मधेसलाई सस्तैमा समेट्न पुलिसका कुशल भुर्तेलले पाँच विकेट लिए । कुशलले ८.३ ओभरमा दुई मेडन राख्दै २२ रन खर्चिए । करण केसीले तीन र राशिद खानले दुई विकेट लिए ।
मधेसका मोहम्मद आदिल आलमले ४२ रन बनाए । रतन रौनकले ११ र हरिशंकर साहले १० रनबाहेक अरू खेलाडीले दोहोरो अंकमा रन जोड्न सकेनन् ।
यसअघि, अमित श्रेष्ठ, आरिफ शेख र कप्तान दीपेन्द्रसिंह ऐरीले अर्धशतक बनाएपछि टस जितेर ब्याटिङमा उत्रिएको पुलिसले ४९.१ ओभरमा सबै विकेट गुमाएर २७३ रन बनाएको थियो ।
पुलिसका आरिफले ८६ बलमा आठ चौका र एक छक्कासहित ७३ रन बनाए । अमितले ९६ बलमा ६५ रन बनाउँदा नौ चौका प्रहार गरे । कप्तान दीपेन्द्रसिंह ऐरीले ४३ बलमा तीन चौका र एक छक्कासहित टिमको खातामा ५१ रन थपे । दिलीप नाथले ४० र ओपनर सुनील धमलाले ११ रन जोडे ।
मधेसका रुपेश सिंह र राजेश यादवले समान तीन विकेट लिए । मोहम्मद आदिल आलमले दुई विकेट लिँदा विशाल पटेल र हरिशंकर साहले एक/एक विकेट लिए ।
