काठमाडौं । इन्डियन प्रिमियर लिग (आईपीएल)मा पञ्जाव किंग्सले चेन्नाई सुपर किंग्सविरुद्ध सात विकेटको सहज जित निकालेको छ । बुधबार एमए चिदम्बरम रंगशालामा सम्पन्न खेलमा चेन्नाईले प्रस्तुत गरेको १६३ रनको लक्ष्य पञ्जावले १७.५ ओभरमा तीन विकेट गुमाएर पूरा गर्यो । 

पञ्जावको जितमा जोनी बेइर्स्टोले ४६ रन बनाए । रिले रोसोउले ४३, कप्तान साम करनले २६, सशांक सिंहले २५ र प्रभसिम्रन सिंहले १३ रन थपे ।

चेन्नाईका शार्दुल ठाकुर, रिचार्ड ग्लिसोन र शिवम दुवेले समान एक विकेट लिए । 

त्यसअघि टस हारेर ब्याटिङमा आएको चेन्नाईले निर्धारित २० ओभरमा सात विकेट गुमाएर १६२ रनको योगफल खडा गरेको थियो । 

चेन्नाईका कप्तान रितुराज गाइकवाडले ६२ रन बनाएका थिए । अजिक्या राहाणेले २९, समिर रिज्वाले २१, मोइन अलीले १५ र महेन्द्रसिंह धोनीले १४ रन थपे । 

पञ्जावका हरप्रित ब्रार र राहुल चहरले समान दुई विकेट लिए । कगिसो रबाडा र अर्शदीप सिंहले एक–एक विकेट लिएका थिए ।  

प्रतियोगितामा चौथो जित निकालेको पञ्जाव १० खेलबाट आठ अंकसहित तालिकाको सातौँ स्थानमा उक्लिएको छ । समान खेलबाट १० अंक जोडेको चेन्नाई तालिकाको चौथो स्थानमा छ ।