काठमाडौं । असोज ३ गते राति काठमाडौंको गोठाटारमा गोली प्रहार गरी लाल मोहम्मदको हत्या भयो । उनको हत्या आशंकामा तीनजना पक्राउ परेका छन् । तर, मुख्य ‘सुटर’सम्म पुग्न प्रहरी असफल भएको छ ।

राजधानीमै भएको यो घटनामा भारतीय ‘सुटर’ समूहको संलग्नता भएको प्रहरी अधिकारीहरूको अनौपचारिक दाबी छ । घटनामा सहयोगीको भूमिका निर्वाह गरेको आरोपमा पक्राउ पर्नेहरूमा एक महिलासहित तीजना छन् । वीरगञ्ज महानगरपालिका–१५ भिस्वा घर भएका रेहान खान र वीरगञ्ज–१६ घर भएका महोरम मियाँ तथा मकवानपुरको बकैया घर भइ कपन बस्दै आएकी २१ वर्षीया सुस्मिता स्याङतान पक्राउ परेका थिए ।

प्रहरीका अनुसार रेहान र महोरम भारतीय नागरिकले वीरगञ्जमा दिएको दुईवटा पेस्तोल उनीहरूले काठमाडौं ल्याएर सुटरलाई दिएका थिए । त्यसबाफत उनीहरूले ‘कमिसन’ पाएका थिए । सुस्मिताले भने पैसा लिएर गोठाटारस्थित लाल मोहम्मदका गतिविधि निगरानी गरेको प्रहरी दाबी छ ।

‘सुटर’ले महोम्मद गाडीबाट ओर्लीनाथ पिछा गरेर गोली प्रहार गरेका थिए । गोली प्रहार गरेको सीसीटिभी फुटेज बाहिरिएको थियो । तीनजना पक्राउ परे पनि गोली प्रहार गर्ने व्यक्ति पक्राउ नपरेको प्रहरी अधिकारी नै बताउँछन् । राजधानीमै भएको गोली प्रहारको घटनामा प्रहरी हत्यारासम्म नपुग्नुलाई कतिपयले गम्भीर सुरक्षा कमजोरी मानिरहेका छन् ।

काठमाडौं प्रहरी परिसरका प्रवक्ता एसपी दिनेशराज मैनाली घटनाबारे थप अनुसन्धान जारी रहेको बताउँछन् । 

प्रहरी अधिकारीहरूको दाबीलाई मान्ने हो भने लाल मोहम्मद हत्याको योजना भारतको नयाँ दिल्ली घर भएका नितेन मदन अरोगाको योजनामा भएको हो । उनी काठमाडौंमा बस्दै आएका थिए । उनको परिवार अहिले पनि काठमाडौंमै छ । काठमाडौंको भोटेबहाल बस्दै आएका नितेनले महोम्मदको हत्याअघि डेरा सारेको खुलेको छ ।
नितेन र लाल मोहम्मदको आपसमा चिनजान रहेको समेत पाइएको छ । उनीहरूबीचमा केही कारोबार समेत भएको पाइएको प्रहरीले बताएको छ ।

महोम्मद गार्मेन्ट व्यावसायी हुन् । उनी जाली नोट कारोबारमा जेलसमेत परिसेकेका थिए । प्रहरीको विशेष व्युरोले पनि घटनाबारे अनुसन्धान र सूचना संकलन गरिरहेको बताइएको छ । मोहम्मदको हत्या कनेक्सन भारतीय अन्डरवल्र्ड डन उदय सेट्ठीसँग रहेको प्रहरी अधिकारीहरू बताउँछन् । उदय सेट्ठी हाल रसुवा कारागारमा छन् । उनी अन्डरवलल्र्ड डन छोटा राजनका मुख्य सहयोगी हुन् ।

काठमाडौंका एक व्यवसायीका छोरालाई अपहरण गरेर १ करोड ५० लाख फिरौती लिएको मुद्दामा उनी जेल परेका हुन् । उनै उदय सेठ्ठीसँग नितेनले नियमित टेलिफोन सम्पर्क गरेको देखिएको छ । हत्यापछि नितेन भेटिएका छैनन् । उनको खोजीमा पनि प्रहरी सक्रिय छ ।

उदय सेठ्ठीसँग नितेनको सम्पर्क देखिएकाले पनि घटना उनीहरूकै योजनामा गराइएको हुनसक्ने प्रहरी आशंका छ । तर, मोहम्मदमाथि गोली प्रहार गर्ने व्यक्ति भारत प्रवेश गरिसकेको प्रहरीकै अधिकारीहरू बताउँछन् । यस्तो अवस्थामा उनीहरूको पहिचान भए पनि नेपाल ल्याउन निकै कठिन भएको प्रहरी अधिकारीहरूको भनाइ छ ।