नयाँ दिल्ली । 'भारतको पहिलो मतदाता'को नामले चिनिने श्याम शरण नेगीको १०५ वर्षको उमेरमा निधन भएको छ । बेलायती उपनिवेशबाट स्वाधिनता हासिल गरेर भारतले पहिलो आमनिर्वाचनको आयोजना गर्दा उनी मतदान गर्ने पहिलो व्यक्ति भएको बताइन्छ । 

त्यसयता नेगीले प्रत्येक चुनावमा नियमित रूपमा मतदान गर्दै आएका थिए । उमेरले १०० नाघेका नेगीले मृत्युवरण गर्नु तीन दिन अघि पनि मतदान गरेका थिए । उनले आफ्नो हिमाचल राज्यको विधानसभाको चुनावमा मतदान गरेका हुन् ।

भीषण हिमपातबाट बच्न सन् १९५२ को चुनावको मितिभन्दा पाँच महिना अगावै सन् सन् १९५१ को प्रारम्भमा आफ्नो राज्यमा आयोजित चुनावमा मतदान गर्ने अवकाशप्राप्त शिक्षक नेगी पहिलो मतदाता रहेको बताइएको छ । भारतले स्वाधीनता हासिल गरेपछिको त्यो पहिलो आम निर्वाचन थियो । 

सो चुनावमा भारतीय राष्ट्रिय कंग्रेसले अत्यधिक मतले चुनाव जितेको थियो । त्यसपछि सन् १८४८ देखि १९४७ सम्म अर्थात झण्डै एक सय वर्ष वेलायती उपनिवेश बन्न बाध्य भारतले जवाहरलाल नेहरूलाई प्रजातान्त्रिक ढंगले निर्वाचित पहिलो प्रधानमन्त्रीको रूपमा पाएको थियो ।

आगामी १२ नोभेम्बरमा हुने चुनाव अघि नै हुलाकमार्फत निधन हुनुअघि मतदान गरेका नेगीलाई चुनाव आयोगका अधिकारीहरूले रातो कार्पेट ओछ्याएर भव्य स्वागत गरेका थिए । नाजुक स्वास्थ्यका कारण पहिलोपटक उनले मतदानस्थलमा नगई यसरी हुलाकमार्फत मतदान गरेका हुन् । 

शनिबारको चुनाव र्‍यालीमा सम्बोधन गर्ने क्रममा भारतीय प्रधानमन्त्री नरेन्द्र मोदीले नेगीप्रति श्रद्धान्जली व्यक्त गरेका थिए । सरकारले नेगीको उनकै गाउँ कल्पमापूर्ण राष्ट्रिय सम्मानसहित अन्त्येष्टि गरिने बताएको छ । 

बीबीसीबाट ।