डडेलधुरा । यही कात्तिक १८ गते नेकपा (एमाले)का अध्यक्ष केपी शर्मा ओलीले डडेलधुरामा बीपी कांग्रेसका उमेदवार कर्ण मल्ललाई आफूहरूको समर्थन हुने घोषणा गरे । कञ्चनपुरको महेन्द्रनगरस्थित चुनावी सभामा सम्बोधन गर्दै ओलीले डडेलधुरामा कांग्रेसबाट विद्रोह गरेका मल्ललाई दिएको समर्थन कायमै रहेको बताए ।

“हामी हाम्रो प्रतिबद्धतामा कायम छौँ । मैले सुनेँ– त्यहाँ कसैले वक्तव्य निकाल्यो भनेर । तर, त्यस्तो अधिकार अरूलाई छैन । त्यो अधिकार केन्द्रलाई मात्रै छ,” उनले महेन्द्रनगरको सभामा भनेका थिए ।

उनले मल्ललाई समर्थन गर्न चुनावी सभामार्फत डडेलधुरा एमालेलाई आदेश नै दिए । तर, ओलीको आदेश कार्यान्वयन गर्ने पक्षमा डडेलधुरा एमाले छैन ।

एमाले डडेलधुराको प्रदेश निर्वाचन क्षेत्र–२ समन्वय समितिले प्रतिनिधिसभामा स्वतन्त्र उमेदवारी दिएका एमाले नेता विक्रमबहादुर शाहीलाई समर्थन गर्ने निर्णय नै गरिसकेको छ । प्रदेश निर्वाचन क्षेत्रको समन्वय समितिका अध्यक्ष प्रेमबहादुर बोहोरा तथा सचिव शिवराम ताम्राकारले स्वतन्त्र उमेदवारी दिएका एमाले नेता शाहीलाई समर्थन गर्ने निर्णय गरेको जानकारी विज्ञप्तिमार्फत दिएका थिए ।

यसअघि नै एमाले डडेलधुराले पनि बीपी कांग्रेसले सहमति भाँडेको भन्दै प्रतिनिधिसभामा उसका उमेदवार मल्ललाई समर्थन गर्न नसकिने निर्णय गरेको थियो । “प्रतिनिधिसभामा बीपी कांग्रेसका कर्ण मल्ल र प्रदेशसभा १ मा एमालेका पठानसिंह बोहरा र प्रदेशसभा २ मा एमालेकै उमेदवार गजेन्द्र शाहीलाई समर्थन गर्ने गरी एमाले र बीपी कांग्रेसबीच सहमति भएको थियो,” असोज २८ गते एमाले डडेलधुराका अध्यक्ष प्रकाशबहादुर साउद र सचिव गजेन्द्र शाहीद्वारा जारी विज्ञप्तिमा उल्लेख छ, “तर, बीपी कांग्रेसले प्रदेशसभा २ मा स्वतन्त्र उमेदवारसँग तालमेल गरेपछि सहमति तोड्न बाध्य भएका छौँ ।”

त्यसअघि, बीपी कांग्रेससँग तालमेल गर्नकै लागि एमाले अध्यक्ष ओलीले डडेलधुरामा प्रतिनिधिसभातर्फ उमेदवारी दर्ता गराएका चक्रप्रसाद स्नेहीको उमेदवारी फिर्ता गराएका थिए ।

मल्ललाई नै समर्थन गर्ने ओलीको निर्देशन कार्यान्वयन गर्न आफूहरू बाध्यकारी नभएको यहाँका एमाले नेता–कार्यकर्ताले बताउन थालेका छन् । सचिव शाही एमाले र बीपी कांग्रेसबीच भएको सहमति बीपी कांग्रेसले नै तोडेकाले समस्या आएको बताउँछन् ।

“अध्यक्षज्यूले डडेलधुराका दुवै प्रदेशमा एमाले उमेदवारलाई समर्थन गरेपछि एमालेले मल्ललाई सहयोग गर्ने बताउनुभएको हो,” उनले भने, “तर, मल्ल उमेदवार रहेको बीपी कांग्रेसले प्रदेश २ मा स्वतन्त्र उमेदवार डा. तारा जोशीलाई समर्थन गरेको छ । यस्तो अवस्थामा एमालेले मल्लज्यूलाई समर्थन गर्ने कुरै भएन ।”

अझै पनि प्रदेशसभाका दुवै क्षेत्रमा बीपी कांग्रेसले एमाले उमेदवारलाई समर्थन गरे मल्ललाई सहयोग गर्न सकिने शाहीको भनाइ छ । डडेधुरामा प्रतिनिधिसभातर्फ प्रधानमन्त्री एवं नेपाली कांग्रेसका सभापति शेरबहादुर देउवा, बीपी कांग्रेसका मल्ल, स्वतन्त्र सागर ढकालसहित आठ उमेदवार प्रतिस्पर्धामा छन् ।

जसपा उमेदवारको समर्थन देउवालाई
जनता समाजवादी पार्टी (जसपा) डडेल्धुराका प्रतिनिधिसभा सदस्य पदका उमेदवार श्याम सिनालले प्रधानमन्त्री देउवालाई समर्थन गर्ने घोषणा गरेका छन् । उनले आफ्नो उम्मेदवारी निष्क्रिय गरी सत्ता गठबन्धनका साझा उमेदवार देउवालाई समर्थन गर्ने घोषणा गरेका हुन् ।

उनले भन्ने, “आगामी मंसिर ४ गते सम्पन्न हुन गइरहेको प्रतिनिधिसभा तथा प्रदेशसभाको निर्वाचनमा जसपा डडेलधुराबाट प्रतिनिधिसभा प्रत्यक्षतर्फको उमेदवार म श्याम सिनालले आफ्नो उमेदवारीलाई पूर्ण रूपमा निष्क्रिय गर्दै वाम लोकतान्त्रिक गठबन्धनका प्रतिनिधिसभा उमेदवार शेरबहादुर देउवालाई समर्थन गर्दछु ।”

उनी र जसपा डडेलधुराका अध्यक्ष लक्ष्मी पनेरु कांग्रेसमा प्रवेश समेत गरेका छन् ।