धनगढी । सुदूरपश्चिम प्रदेश सरकारका मुख्यमन्त्री राजेन्द्रसिंह रावलले विश्वासको मत लिने आज अन्तिम दिन हो ।

त्यसका लागि बुधबार स्थगित भएको सुदूरपश्चिम प्रदेशसभा बैठक आज १ बजे बोलाइएको छ । सभामा मुख्यमन्त्री रावलले विश्वासको मतका लागि प्रस्ताव पेश गर्ने कार्यसूचि रहेको प्रदेशसभा सचिव देवबहादुर बोगटीले बताए ।

मुख्यमन्त्री नियुक्त हुँदा साथ दिएको निर्णायक शक्ति नागरिक उन्मुक्ति पार्टी भने विश्वासको मत नदिने निर्णयमा अडिग छ । पार्टीका सुदूरपश्चिम प्रमुख सचेतक लक्ष्मणकिशोर चौधरीले आफूसहित सातै जना प्रदेशसभा सदस्य काठमाडौंमा रहेको बताए । 

"हाम्रो माग सम्बोधन भएपछि मात्रै आज फर्किन्छौं," उनले भने, "हामीले नियुक्त हुँदा उहाँहरूलाई सहयोग गरेका थियौं । तर, उहाँहरुले गर्नुभएको छैन । उल्टै हाम्रा माननीयज्यूलाई पक्राउ गरिरहनुभएको छ ।" 

नाउपाले टीकापुर काण्डमा दोषी ठहर भई जेलमा रहेका नेता रेशम चौधरीलगायतका नेताहरुलाई रिहा नगरेसम्म रावललाई विश्वासको मत नदिने अडान लिएको छ ।

नाउपाले विश्वासको मत नदिए रावल मुख्यमन्त्रीबाट पदमुक्त हुनेछन् । त्यसपछि सबैभन्दा ठूलो दलको हैसियतले नेपाली कांग्रेसले सरकारको नेतृत्व गर्नेछ । सुदूरपश्चिम प्रदेश सभामा नेपाली कांग्रेसका १९, माओवादीका ११, एमालेका १०, नाउपाका ७, एकीकृत समाजवादीका ४ तथा स्वतन्त्र र राप्रपाका १/१ जना सांसद छन् ।