सोल । अमेरिकाले दक्षिण कोरियासँग संयुक्त सैनिक अभ्यास विस्तार गरेपछि उत्तर कोरियाले अमेरिकाको आलोचना गरेको छ । सोलले अमेरिका र दक्षिण कोरियाको संयुक्त अभ्यासलाई आफूमाथिको सम्भावित आक्रमणको तयारीका रूपमा लिएको छ । 

मंगलबार उत्तर कोरियाको विदेश मन्त्रालयले संयुक्त अभ्यासलाई लिएर थप शक्तिशाली कदमहरू चालिने चेतावनी दिएको छ । अमेरिका र दक्षिण कोरियाले  एफ–३५ लडाकु जेट विमानसहित २०० वटा भन्दा बढी विमान सम्मिलित हवाई अभ्यास थालेपछि उत्तर कोरियाको चेतानीयुक्त प्रतिक्रिया आएको हो । 

उत्तर कोरियाले धमाधम हातहतियार परीक्षण गर्दै आणविक हमलाको धम्की दिन थालेपछि अमेरिका र दक्षिण कोरियाले पनि आफ्नो प्रतिरक्षा बढाउन थालेका हुन् ।

उत्तर कोरियाले नयाँ कीर्तिमान नै राखेर यस वर्ष हतियारको प्रदर्शन गरेको छ । विकासको क्रममा रहेको अन्तरमहादेशीय क्षेप्यास्त्र र मध्यम दुरीका क्षेप्यास्त्रलगायत उत्तर कोरियाले ४० भन्दा बढी 

ब्यालेस्टिक क्षेप्यास्त्र जापानतर्फ प्रक्षेपण गरेको छ ।

अमेरिका र दक्षिण कोरियाले फेरि यस वर्ष ठुलो सैनिक अभ्यास सुरु गरेका छन् । विगतका केही वर्ष प्योङयाङसँग कूटनीतिक दायरा सिर्जना गर्ने प्रयास र कोरोना महामारीका कारण संयुक्त सैनिक अभ्यासको आकारलाई घटाइएको थियो । 

'सतर्क तुफान' नाम दिइएको अमेरिका र दक्षिण कोरियाबीचको संयुक्त हवाई सैनिक अभ्यास शुक्रबारसम्म जारी रहने छ । यसअघि दक्षिण कोरियाले आफ्नो वार्षिक १२ दिने 'होगुक' स्थल सैनिक अभ्यास सम्पन्न गरेको थियो । त्यसमा पनि केही अमेरिकी सेनाको सहभागिता रहेको दक्षिण कोरियाली अधिकारीहरूले बताएका छन् । 

एपीबाट ।