कपिलवस्तु । कपिलबस्तुको चन्द्रौटाको हाट बजारमा हरेक मंगलबार खसी, बोका र बाख्रा खरिदबिक्री हुने गरेको छ । कपिलवस्तुको शिबराज नगरपालिका ५ चन्द्रौटामा हरेक मंगलबार खसी, बोका र बाख्राको खरिदबिक्रीका लागि हाट बजार लाग्ने गरेको छ ।

अरु बेलाको मंगलबार एक सयदेखि दुई सयका हाराहारीमा खसी, बोका र बाख्रा खरिदबिक्री हुने गरे पनि चाडपर्वका बेला भने अत्यधिक रूपमा खसी, बोका र बाख्रा खरिदबिक्री हुने गरेको खसीबोका व्यापारी गुठे कुरेसी बताउँछन् । हरेक मंगलबार लाग्ने हाट बजारमा रुपन्देही, कपिलवस्तु, दाङ, बाँके जिल्लाबाट खसी बोका र बाख्रा खरिदबिक्रीका लागि ल्याइन्छ ।

चन्द्रौटाको हाट बजारमा दाङ, बुटवल, नारायणघाट, पोखरा, काठमाडौंलगायत ठाउँबाट खसी, बोका र बाख्रा खरिदका लागि व्यापारीहरु आउने गरेको स्थानीय मनिष यादवले बाह्रखरीलाई जानकारी दिए । उनका अनुसार चोरीपैठारी गरी भारतबाट समेत खसी, बोका र बाख्रा ल्याइँदा आफ्ना उत्पादनले खरिदबिक्रीमा भाउ नपाउने हो कि भन्ने चिन्ता लाग्ने गरेको उनको भनाइ छ । चौरीपैठारीबाट खसी, बोका ल्याएको थाहा पाउँदा पनि प्रशासन भने मौन रहेको उनको गुनासो छ ।