काठमाडौं । सत्तारूढ दल नेपाली कांग्रेसको चुनावी घोषणापत्र सार्वजनिक कार्यक्रम पटक–पटक स्थगित गरिएको छ ।

आउँदो मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि तयार पारिएको घोषणापत्र शनिबार बेलुका नै सार्वजनिक गर्ने तयारी थियो । तर, प्रधानमन्त्री समेत रहेका पार्टी सभापति शेरबहादुर देउवा व्यस्त रहेको भन्दै त्यो दिन सार्वजनिक गरिएन ।

त्यसपछि आइतबार (हिजो) बेलुका ५ बजे घोषणापत्र सार्वजनिक गरिने बताइएको थियो । बेलुका ५ बजे भर्चुअल रूपमा घोषणापत्र सार्वजनिक गरिने भन्दै कांग्रेस केन्द्रीय कार्यालयबाट विज्ञप्ति जारी गरिएको थियो । तर, अन्तिम समयमा सोमबार बिहान साढे ३० बजे घोषणापत्र सार्वजनिक गर्ने भन्दै स्थगन गरियो ।

घोषणापत्र लेखन समितिका प्रवक्ता समेत रहेका सहमहामन्त्री जीवन परियारले सभापति देउवाको व्यस्तताका कारण अन्तिम समयमा कार्यक्रम रोक्नुपरेको बताएका थिए ।

तर, सोमबार पनि घोषणापत्र सार्वजनिक गरिएन । बिहान विज्ञप्ति जारी गर्दै घोषणापत्र सार्वजनिक गर्ने कार्यक्रमलाई अनिश्चित समयका लागि स्थगित गरिएको छ ।

आखिर किन पटक–पटक सो कार्यक्रम स्थगित गरियो ? सहमहामन्त्री परियार सभापति देउवाको व्यस्तताका कारण घोषणापत्र सार्वजनिक गर्न नसकिएको बताउँछन् ।

“(आज) ११ बजे गठबन्धनको कार्यक्रम भएकाले तयारी गर्नुपर्‍यो । त्यसकारण अन्तिम समयमा आएर हामीले कार्यक्रम स्थगन गर्नुपरेको हो,” उनले भने ।

समितिका अर्का एक सदस्य भने तिहार बिदाका कारण मंगलबारदेखि तीन दिन छापा पत्रिका प्रकाशन नहुने भएकाले पनि घोषणापत्र सार्वजनिक नगरिएको बताउँछन् ।

“मंगलबारबाट प्रिन्ट मिडिया बन्द हुनेरहेछ । यत्रो दुःख गरेर लेखेको घोषणापत्रको प्रचार नहुने भयो,” समितिका एक सदस्यले बाह्रखरीसित भने, “पत्रिकामा फोटो, समाचार आएन भने त दुःख गरेको के अर्थ भयो र ! अनि, सार्वजनिक नगरिएको हो ।”

५० पृष्ठमा लेखिएको घोषणापत्र अब यही कात्तिक ११ गते सार्वजनिक गर्ने तयारी छ ।

घोषणापत्रमा सुशासन र आर्थिक विषयलाई प्राथमिकता दिइएको छ । यस्तै, राज्यको परराष्ट्र नीति, आर्थिक नीति, शिक्षा, स्वास्थ्यलगायत विषयलाई उच्च प्राथमिकता दिइएको परियारले जानकारी दिए ।

समितिले विषयगत समिति बनाएर घोषणापत्रमाथि छलफल गरिएको थियो । सामाजिक सञ्जाललगायत विभिन्न माध्यमबाट समेत सुझाव मागिएको थियो । ती सबै विषयलाई समेटेर घोषणापत्र लेखिएको उनले जानकारी दिए ।

महामन्त्री विश्वप्रकाश शर्मा नेतृत्वको ४१ सदस्यीय समितिका डा. स्वर्णिम वाग्ले, डा. गोविन्द पोखरेल, डा. कृष्णप्रसाद पौडेल, गेजा शर्मा वाग्लेजस्ता विषयगत विज्ञहरूले घोषणापत्र लेखेका हुन् ।