काठमाडौं । बुहारीमा प्रत्यारोपण गर्न निकालिएको सासूको मिर्गौला प्रत्यारोपण नगरी सर्जन अस्पतालबाट बाहिरिएपछि वीर अस्पताल दुई दिनयता तनावग्रस्त बनेको छ । डा. पारसमणि नेपाल र डा. अनिल श्रेष्ठ बिरामीका आफन्त र अस्पतालमा समेत जानकारी नगराई हिँडेपछि तनाव उत्पन्न भएको हो ।

गएको मंगलबार उनीहरू वीर अस्पतालबाट हिँडेका थिए । उनीहरू धादिङको गल्छी गाउँपालिका–२, कल्लेरीकी ३५ वर्षीया चमेली गैरेलाई उनकै ५८ वर्षीया सासूबाट मिर्गौला प्रत्यारोपण गर्न खटिएका थिए ।

तीन महिनायता विभिन्न परीक्षण गरी मंगलबार प्रत्यारोपणको ‘डेट फिक्स’ गरिएको थियो । तर, सो मिर्गौला प्रत्यारोपण गर्न नसकिने भन्दै सर्जनहरू अस्पतालबाट बाहिरिएका थिए । त्यसपछि बिरामीका आफन्तहरू आन्दोलित भएका हुन् ।

“हाम्रो बिरामीलाई मंगलबार बिहान १० बजेबाट प्रत्यारोपण सुरु गर्ने भनेर लगिएको थियो । तर, दिउँसो २ बजे एक्कासि चमेलीको नसामा समस्या छ भन्दै प्रत्यारोपण हुन नसक्ने खबर पायौँ । जबकि, हामीले सबै परीक्षण गराइसकेका थियौँ र रिपोर्टमा कुनै खराबी देखाइएको थिएन,” चमेलीका एक आफन्तले भने ।

अस्पताल भन्छ– बिरामीको अवस्था ठिक छ, तर एउटा मिर्गौला खेर गयो 
तनाव उत्पन्न भएपछि अस्पतालले यस विषयमा छानबिन गर्न सिनियर सर्जन डा. प्रवीण श्रेष्ठको संयोजकत्वमा समिति गठन गरेको छ । अस्पतालका निर्देशक डा. भूपेन्द्रकुमार बस्नेत बिरामीका आफन्तलाई ‘कन्भिन्स’ गरेर पठाइएको र थप कुरा समितिको प्रतिवेदनानुसार गरिने बताउँछन् ।

“अहिले दुवै बिरामीको अवस्था ठिक छ । उहाँको समस्या पहिले थाहा भएको भए यस्तो हुँदैनथ्यो । अब एउटा मिर्गौलाचाहिँ खेर गयो । प्रत्यारोपणमा संलग्न दुवै सर्जनहरू हामीसँगै अस्पतालमै हुनुहुन्छ । अहिले पनि हामी छलफलमै छौँ,” डा. बस्नेतले बाह्रखरीसँग भने ।