जनकपुरधाम । जनता समाजवादी पार्टी (जसपा) सर्लाहीका समन्वय समितिले सोमबार राति एउटा विज्ञप्ति सार्वजनिक गर्‍याे । विज्ञप्तिमा तीनजना केन्द्रीय सदस्यसहित चारजनालाई सधारण सदस्यसमेत नरहने गरी कारबाही गरिएको उल्लेख छ । 

उमेदवारी दर्ताको एक सातापछि जसपाबाट 'बागी' उमेदवारी दिएका केन्द्रीय कार्यकारणी सदस्य रामनरेश राय, केन्द्रीय सदस्य गायत्री देवी साह, राजेश कुमार यादव र मधेस प्रदेश समिति सदस्य गंगा लामालाई कारबाही गरिएको छ । 

उनीहरूलाई पहिला पार्टीले फकाउने प्रयास गरेको थियो । पार्टीको निर्देशन नटेरेपछि कारबाही गरिएको छ । पार्टीको अनुशासनविपरीत गएको भन्दै कारबाही गरिएको जिल्ला अध्यक्ष वीरेन्द्र कुमार रायले पनि पुष्टि गरे । "पहिले पार्टीले उनीहरूलाई उमेदवारी फिर्ता लिन आग्रह गरेको थियो । नमानेपछि स्पष्टीकरण पनि सोधिएको थियो," उनले भने, "त्यसको जवाफ नआएपछि र पार्टीको निर्देशन नमानेपछि कारबाही गरिएको छ ।"

कारबाहीमा परेका रामनरेश राय ०७४ मा तत्कालीन राष्ट्रिय जनता पार्टी (राजपा)बाट निर्वाचित थिए । पछि जसपाबाट अलग्गिएर महन्त ठाकुरको नेतृत्वमा लोसपा बन्दा उनले जसपा नै रोजे । त्यतिबेला उनी मधेस प्रदेशमा उद्योग, पर्यटन, वन तथा वातावरण मन्त्रीसमेत थिए । जसपा रोज्दा केही दिन उनको मन्त्री पद पनि जोगिएको थियो । तर, पछि सरकारमा अन्य दललाई सहभागी गराउँदा उनलाई पदमुक्त गरिएको थियो । उनले राजीनामा दिन मानेका थिएनन् । त्यतिबेलादेखि नै पार्टीमा उनको असन्तुष्टि छ । 

आसन्न निर्वाचनमा पनि गठबन्धनका कारण पार्टीबाट उनी उमेदवार बन्न पाएनन् । त्यसपछि उनले सर्लाही क्षेत्र नम्बर २ को (क)बाट स्वतन्त्र रूपमा उमेदवारी दर्ता गराए । र, प्रचारप्रसारमा व्यस्त भए ।

याे क्षेत्रमा नेकपा एमाले र जसपाबीच चुनावी तालमेल भएको छ । उनले बागी स्वतन्त्र उमेदवारी दिएको सिट एमालेको भागमा परेको छ । यहाँ एमालेले राजनारायण यादवलाई उमेदवार बनाएको छ । उनी एमाले जिल्ला अध्यक्षसमेत छन् । 

सर्लाहीमा जसपाले कारबाही गरेका चारै जनाले बागी उमेदवारी दिएका छन् । गायत्रीदेवी साहले क्षेत्र नम्बर ३ को (ख), राजेश कुमार यादव क्षेत्र नं. २ (ख) र गंगा लामाले क्षेत्र नं. ३ (क)बाट प्रदेशसभा सदस्यमा उमेदवारी दिएका छन् । यी सबै क्षेत्रमा जसपा–एमालेबीच तालमेल भएको छ ।

सोमबार नै महोत्तरीमा पनि जसपाले केन्द्रीय सदस्य कृष्ण शंकर साहलाई कारबाही गरेको छ । उनीमाथि पार्टीको नेत्रीमाथि दुर्व्यवहार गरेको आरोप छ ।

यस्तै, गत असोज २६ गते पर्सा जिल्ला समितिले पनि सातजनालाई कारबाही गर्‍याे ।

पार्टीले केन्द्रीय सदस्य करिमा वेगम, प्रदेश समिति सदस्य जन्नत अन्सारी, गौरीशंकर साह, प्रदेश परिषद् सदस्य शिवकुमार साह, युवा नेता कुमार दुवेदी, रुपेशमान सिंह र प्रमोद जयसवाललाई कारबाही गरेको थियो ।  उनीहरूमध्ये पाँचजनाले बागी उमेदवारी दिएका छन् ।

वेगमले पर्सा क्षेत्र नं. २ (ख), अन्सारीले क्षेत्र नं. १ (क), द्विवेदी र सिंहले पनि क्षेत्र नं. २ (ख), जयसवालले क्षेत्र नं. ३ (क) बाट उमेदवारी दिएका छन् । नेपाल सुशासन पार्टीमा गएर शिवकुमार र गौरीशंकर साहले क्रमशः क्षेत्र नं. ३ (क) र ३ (ख)बाट उमेदवारी दिएका छन् ।

जसपाबाट कारबाहीमा परेका यी प्रतिनिधिमुलक पात्र मात्र हुन् । अन्य जिल्लामा पनि बागी उमेदवारी दिएकालाई कारबाही गरिएको छ ।

मधेस प्रदेश समितिका सचिव दिनेश यादवका अनुसार सबै जिल्लाबाट विवरण आउने क्रममा रहेको बताए ।

"पार्टीबाट राजीनामा दिइसकेका वा अन्य पार्टी प्रवेश गरेकालाई कारबाही गर्ने कुरै भएन, उनीहरूको च्यापटर क्लोज भइसक्यो," उनले भने, "जसले पार्टीमा भएर पनि आफ्नै वा तालमेल गरिएको दलका उमेदवारविरुद्ध लागेको छ त्यस्तालाई कारबाही गर्दैछौँ । १२ जनालाई कारबाही गरिसकेका छौँ । त्यस्ता अन्य नेता पनि पाइपलाइनमा छन् । कतिपयले उमेदवारी फिर्ता लिने तयारी पनि गरिरहेका छन् ।"