काठमाठौं । नवाैँ राष्ट्रिय खेलकुदमा सोमबार पौडी प्रतियोगितामा सात राष्ट्रिय कीर्तिमान बनेका छन् । 

पुरुषको ४०० मिटर फ्रीस्टाइलमा त्रिभुवन आर्मीका नासिर हुसेनले आफ्नै कीर्तिमान भङ्ग गर्दै नयाँ कीर्तिमानसहित स्वर्ण पदक जितेका छन् । नासिरले निर्धारित दुरी ४ मिनेट ०८.६७ सेकेण्डमा पार गर्दै स्वर्ण पदक जितेका हुन् । यसअघि उनले १३औँ दक्षिण एसियाली खेलकुद (साग)मा ४ मिनेट ३३.०५ सेकेण्डको कीर्तिमान बनाएका थिए । 

यस स्पर्धामा रजत पदक जित्ने एनआरएनएका आशिष सापकोटाले ४ मिनेट २२.४५ सेकेण्डमा दुरी पारे । वाग्मतीका इर्भिन श्रेष्ठले ४ मिनेट २५.७४ सेकेण्डमा दुरी गर्दै काश्य पदक जित्न सफल भए । 

पोखराको बिरौटास्थित फिस्टेल एकेडेमीमा भएको प्रतियोगितामा १०० मिटर बटरफ्लाईमा पनि नासिरले राष्ट्रिय कीर्तिमान बनाए । नासिरले ५७.८६ सेकेण्डमा दुरी पूरा गर्दै कीर्तिमान बनाउन सफल भएका हुन् । यस स्पर्धामा यसअघि अनुभव सुब्बाको नाममा ५९.७७ सेकेण्डको कीर्तिमान थियो । अनुभवले २५औँ खुला राष्ट्रिय पौडी च्याम्पियनसिपमा उक्त कीर्तिमान बनाएका थिए । 

यस स्पर्धामा एनआरएनएका आशिष सापकोटाले ५९.६८ सेकेण्ड दुरी पूरा गर्दै रजत पदक जिते । अनुभव सुब्बाले ५९.७३ सेकेण्डमा दुरी पूरा गरी काश्य पदक जिते । 

पुरुष २०० मिटर ब्रेस्टस्ट्रोकमा एनआरएनएका आशिष सापकोटाले २ मिनेट २९.६० सेकेन्डको नयाँ कीर्तिमान बनाउँदै स्वर्ण पदक जिते । यस स्पर्धामा यसअघि सुभम श्रेष्ठको नाममा २ मिनेट ३१.१५ सेकेण्डको कीर्तिमान थियो । प्रदेश–१ का विकास कुमालले २ मिनेट ३०.७६ सेकेण्डमा दुरी पार गरी रजत पदक जिते । वाग्मतीका सेरेन सिंहले २ मिनेट ३६.७४ सेकेण्डमा दुरी पूरा गरी काश्य पदक जिते । 

पुरुषको ५० मिटर ब्याकस्ट्रोकमा त्रिभुवन आर्मीका एलेक्जेण्डर शाहले २७.४६ सेकेण्डको कीर्तिमानसहित स्वर्ण पदक हात पारे । उनले आजै बिहान भएको हिट चरणमा आफुले नै बनाएको २७.५४ सेकेण्डको कीर्तिमान तोडेका हुन् । एपीएफका तेन्जिङ्ग नाम्दो रायन गुरुङले २९.६१ सेकेण्डमा दुरी पूरा गरी रजत र आर्मीकै अनुभव सुब्बाले काश्य पदक जिते । 

पुरुष ४०० मिटर फ्रीस्टायल रिलेमा पनि राष्ट्रिय कीर्तिमान बनेको छ । त्रिभुवन आर्मीका अनुभव सुब्बा, दिलिप थापामगर, नासिर हुसेन र एलेक्सजेण्डर शाहको टिमले ३ मिनेट ४५.५१ सेकेण्डमा दुरी पूरा गरी कीर्तिमानसहित स्वर्ण पदक जिते । नेपाल पुलिसका गौरब लामा, दिपंकर अवाले, सानीशंकर बहादुर रघुराजवंशी र सुविज्ञमान तुलाधरको टिमले ३ मिनेट ४६.३७ सेकेण्डमा दुरी पूरा गरी रजत पदक जित्यो । 

१३औँ सागमा एलेक्सजेण्डर शाह, अनुभव सुब्बा, सैयद हेम्जा शाह र तेन्जिन नामडोल रायन गुरुङको टिमले बनाएको ३ मिनेट ४६.९७ सेकेन्डको कीर्तिमानलाई तोड्दै आजै बिहान हिट चरणमा पुलिसको टिमले ३ मिनेट ४६.८३ सेकेण्डको कीर्तिमान बनाएका थिए । तर, यो कीर्तिमानले फाइनलमा आर्मीका खेलाडीले भङ्ग गरे । 

महिला १०० मिटर बटरफ्लाईमा एनआरएनएकी एश्ले सापकोटा डंगोलले राष्ट्रिय कीर्तिमान कामय गर्ने क्रममा १ मिनेट ७.७४ सेकेण्डमा दुरी पार गर्दै स्वर्ण पदक जितिन् । एश्लेले गौरिका सिंहले आठौँ राष्ट्रिय खेलकुदमा बनाएको १ मिनेट ०९.९७ सेकेण्डको कीर्तिमान तोडेकी हुन् । यस स्पर्धामा नेपाल पुलिसकी मेगन गुरुङले १ मिनेट १४.५२ सेकेण्डमा दुरी पूरा गरी रजत र वाग्मतीकी रोशा न्यौपानेले १ मिनेट १८.७४ सेकेण्डमा दुरी पूरा गरी काश्य पदक जिते । 

महिला २०० ब्रेस्टस्ट्रोकमा त्रिभुवन आर्मीकी डुवाना लामाले २ मिनेट ४३.२३ सेकेण्डमा दुरी पूरा गरी राष्ट्रिय कीर्तिमानसहित स्वर्ण पदक जितिन् । उनले आजै विहान हिट चरणमा आफैले बनाएको २ मिनेट ४४.२८ सेकेण्डको कीर्तिमान तोडेकी हुन् । आर्मीकै उपास्ती महर्जनले २ मिनेट ५६.९७ सेकेण्डमा दुरी पार गर्दै रजत र नेपाल पुलिसकी अदिप्सा बैद्यले ३ मिनेट ०.०३ सेकेण्डमा दुरी पूरा गरी काश्य पदक जितिन् । 

महिला ५० मिटर ब्याकस्ट्रोकमा ओलम्पियन गौरिका सिंहले स्वर्ण जितिन् । त्रिभुवन आर्मी क्लबकी गौरिकाले ३०.८० सेकेण्डमा दुरी पुरा गरी स्वर्ण पदक जितेकी हुन् ।

महिला ८०० मिटर फ्रीस्टाइल रिलेमा आर्मीका अनुशिवा तण्डुकार, उपास्टी महर्जन, डुवाना लामा र गौरिका सिंहको टिमले ९ मिनेट २७.७३ सेकेन्डमा निर्धारित दूरी पार गर्दै स्वर्ण पदक जिते । नेपाल पुलिसका आर्या महर्जन, सरासी खड्का, समिरा थापामगर, मेगान गुरुङको टिमले १० मिनेट ०१.३० सेकेन्डमा निर्धारित दूरी पार गर्दै रजत पदक जिते । १० मिनेट ०९.५७ सेकेन्डमा निर्धारित दूरी पार गर्ने वाग्मती प्रदेशका रोशा न्यौपाने, श्रेनु महर्जन र सारिया महर्जनले काश्य पदक जिते ।

तेस्रो दिन सकिँदा १६ स्वर्ण ५ रजत र ६ काश्य गरी कुल २७ पदक जितेर त्रिभुवन आर्मी शीर्ष स्थानमा छ ।

एनआरएनए ६ स्वर्ण, ६ रजतगरी कुल १२ पदकसहित दोस्रो स्थानमा छ ।

एपीएफ ३ स्वर्ण, ४ रजत र ३ काश्य गरी कुल १० पदकसहित तेस्रो स्थानमा छ ।

पुलिस १ स्वर्ण, ५ रजत, ९ काश्य गरी कुल १५ पदकसहित चौथो र प्रदेश–१ एक स्वर्ण, ३ रजत र १ काश्य गरी कुल ५ पदकसहित पाँचौं स्थानमा छ ।

४ रजत, र ८ काश्य गरी कुल १२ पदक जितेको वाग्मती छैटौँ स्थानमा छ ।