जनकपुरधाम । धनुषा क्षेत्र नम्बर–४ मा नेकपा (एमाले) र जनता समाजवादी पार्टी (जसपा)बीच चुनावी तालमेलमा विवाद देखिएको छ ।

शनिबार सार्वजनिक भएको एमाले–जसपा सहमतिअनुसार धनुषा–४ एमालेको भागमा परेको छ । यो क्षेत्रको प्रदेशसभातर्फ ‘क’ जसपा र ‘ख’ एमालेले पाउने सहमतिपत्रमा उल्लेख छ ।

तर, जसपाका नेता महाजन यादव प्रतिनिधिसभाका लागि धनुषा–४ बाट आफूले टिकट पाइसकेको दाबी गर्छन् । “पौने १२ बजे पार्टीबाट मलाई टिकटको लागि फोन आएको थियो । काठमाडौंबाट मैले टिकट लिएर आएँ, भोलि उमेदवारी दिन्छु,” उनले भने, “सहमतिविपरीत पहिला एमालेले हाम्रो भागमा परेको क्षेत्रमा उमेदवारी दिने तयारी गरेपछि हामीले पनि उमेदवारी दिने अवस्था आएको छ ।”

उनले धनुषा–२ र ४ मा एमालेसित ‘मित्रवत् प्रतिस्पर्धा’ गरिने बताए ।

एमाले नेता सन्तोष यादवले पनि यो कुराको पुष्टि गरे । “धनुषाको निर्वाचन क्षेत्र–२ र ४ मा सहमति हुन सकेन । यहाँ जसपा र एमाले दुवै पार्टीको आफ्नै आफ्नै उमेदवार हुन्छ,” उनले भने ।

धनुषा–४ बाट एमालेका रघुवीर महासेठ उमेदवार बन्नेछन् । प्रदेशसभातर्फ धनुषा–४ ‘क’मा एमालेका सन्तोष यादव र ‘ख’मा हरिनारायण महतो उमेदवार बन्नेछन् ।

सत्ता गठबन्धनभित्र धनुषा–४ नेपाली कांग्रेसको भागमा परेको छ । यहाँ कांग्रेसका सहमहामन्त्री महेन्द्र यादवले उमेदवारी दिने तयारी छ । गठबन्धनभित्र धनुषा–४ ‘क’को अहिलेसम्म टुंगो लागेको छैन । धनुषा–४ ‘ख’मा नेकपा (एकीकृत समाजवादी)का तर्फबाट शत्रुधन महतोले उमेदवारी दिने तयारी छ ।

त्रिपक्षीय भिड्न्त
धनुषा–४ मा कडा प्रतिस्पर्धा हुने सम्भावना छ । यो क्षेत्रमा अब पुरानै नेता उमेदवार हुने निश्चितजस्तै छ । चारदलीय गठबन्धनबाट कांग्रेसका सहमहामन्त्री महेन्द्र यादव, एमालेका रघुवीर महासेठ र जसपाका महाजन यादवले उमेदवारी दिन लागेका हुन् ।

०७४ को निर्वाचनमा पनि यिनै तीन नेताबीच कडा प्रतिस्पर्धा भएको थियो । त्यति बेला एमाले र नेकपा (माओवादी केन्द्र)बीचको गठबन्धनबाट महासेठ निर्वाचित भएका थिए । उनले कांग्रेस नेता महेन्द्रलाई दुई हजार ५४१ मतान्तरले पराजित गरेका थिए । महासेठले २२ हजार ५३२ मत प्राप्त गरेका थिए । यादवले १९ हजार ९९१ मत ल्याएका थिए ।

अहिलेको परिस्थिति फरक छ । अहिले एमाले–माओवादीबीच तालमेल छैन । एमालेबाट माधव नेपाल समूह पनि अलग भइसकेको छ । कांग्रेस समेत पहिलाको जस्तो अवस्थामा छैन ।

कांग्रेसका जिल्ला सभापतिमा पराजित सन्तोष यादव यही क्षेत्रका हुन् । हालै पार्टी त्याग गरी उनी एमालेमा प्रवेश गरेका छन् । उनी सोही क्षेत्रको ‘क’बाट एमालेका उमेदवार बन्ने तयारी छ ।

कांग्रेसको १४औँ महाधिवेशनले पनि पार्टीभित्र कलह छ । त्यसले निर्वाचनमा असर पर्न सक्ने बताइन्छ ।

कांग्रेसका धनुषा सभापति योगेन्द्र पञ्जियार पनि यही क्षेत्रका हुन् । उनी नेता विमलेन्द्र निधि समूहबाट सभापतिमा दोस्रो चरणमा विजयी भएका थिए । त्यति बेला नेता महेन्द्र यादवले पार्टी सभापति शेरबहादुर देउवा समूहबाट सन्तोषलाई सभापतिमा सघाएका थिए । सोही कारण अहिले पञ्जियारले पनि उनलाई नसघाउने नेताहरूको अनुमान छ ।