काठमाडौं । नेपाली युवा टोली एएफसी यू–१७ एसियन कप २०२३ छनोट प्रतियोगिताका लागि अहिले भियतनाममा छ । एन्फाको उपेक्षामा परेको नेपाली टोलीले आफ्नो प्राथमिक लक्ष्य एसियन कप छनोट नै रहेको जनाएको छ । 

नेपाल रहेको समूहमा थाइल्यान्ड, भियतनाम र चाइनिज ताइपेई छन् । प्रतियोगितामा १० समूहका १० टिम र उत्कृष्ट ६ उपविजेताले फाइनल चरणमा स्थान पक्का गर्नेछन् ।

नेपालले पहिलो खेल अक्टोबर ५ मा थाइल्यान्डविरुद्ध, अक्टोबर ७ मा भियतनाम र अक्टोबर ९ मा चाइनिज ताइपेईविरुद्ध खेल्नेछ ।

उद्घाटन खेलका अगाडि आयोजित पत्रकार सम्मेलनमा कुन टिमका प्रशिक्षकले के भने ? 

नेपाल  
नेपाली टिमका मुख्य प्रशिक्षक उर्जन श्रेष्ठले समूहका सबै टिमको स्तर उस्तै रहेको बताए ।

 "यो समूहका सबै टिमको स्तर उस्तै छ जस्तो लाग्छ । हामी सबै विपक्षी टिमलाई सम्मान गर्छौं । कुनै पनि खेल सजिलो हुने छैन । यद्यपि हाम्रो लक्ष्य अधिकतम अंक बटुलेर छनोट हुने हो । थाइल्यान्डसँगको पहिलो खेलमा हाम्रो लक्ष्य जित नै हुनेछ,"  मुख्य प्रशिक्षक श्रेष्ठले भने । 

नेपाली टिमका कप्तान प्रशान्त लक्षमले आफूहरू कठोर मेहनत गर्ने उद्देश्यले भियतनाम आइपुगेको प्रतिक्रिया दिए ।

"‘सबै खेलमा शतप्रतिशत मेहनत गर्नेछौँ । सबै खेलमाल संमयता अपनाउनेछौँ," लक्षमको भनाइ थियो।

थाइल्यान्ड 
थाइल्यान्डका मुख्य प्रशिक्षक पिपोब अनमोले समूहका सबै टिम बलिया रहेको भएको र उनीहरूको सामना गर्न आफूहरू पूर्णरूपमा तयार रहेको बताए । 

"हाम्रो तयारी राम्रो छ । नेपालको सामना गर्न हामी तयार गर्छौं । नेपाल सजिलो विपक्षी होइन । नेपाली खेलाडीहरू प्राविधिक रूपमा कुशल छन्," अनमोले भने ।

भियतनाम
भियतनामका मुख्य प्रशिक्षक कुओक टुआनले समूहका चारै टिम एसियन कपमा छनोट हुन सक्षम रहेको बताए ।

"सबै टिम समूह विजेता बन्ने दौडमा छन् । कुनै पनि टिम छनोट हुन सक्छन् । एउटा मात्र टिमलाई दाबेदार मान्न मिल्दैन । यसकारण हामी कुनै पनि टिमलाई कमजोर आक्ने पक्षमा छैनौँ । तीन वटै टिमसँग मेहनत गरेर खेल्नुपर्छ । हामीलाई घरेलु समर्थकको समर्थन हुनेछ । त्यसले हामीलाई अवश्य पनि उत्साहित बनाउनेछ," टुआनले भने।

चाइनिज ताइपेई
चाइनिज ताइपेइका मुख्य प्रशिक्षक साई वेन यीले समूह कठिन भए पनि सकारात्मक नतिजा निकाल्न आफूहरू आत्मविश्वासी रहेको बताए । 

"भियतनाम र थाइल्यान्डजस्ता टिम भएको समूह स्वाभाविक रूपमा कठिन हुन्छ । तर हामी सबै खेलमा मेहनत गर्न र आफ्नो पक्षमा नतिजा निकालन आत्मविश्वासी छौँ," वेन यीले भने।