काठमाडौं । गोरखा राइफल्समा भर्ना भएका अनिल चौहान भारतका नयाँ चिफ अफ डिफेन्स स्टाफ (सीडीएस) नियुक्त भएका छन् ।

भारतीय सेनाको गोरखा ब्रिगेडअन्तर्गत ११ जीआरका लेफ्टिनेन्ट जनरल (अवकाश) चौहान भारतको थल, जल र वायु सेना तथा सरकारबीच समन्वय प्रमुखको भूमिकासहित सीडीएसमा नियुक्त भएका हुन् । 

भारतीय प्रधानमन्त्री नरेन्द्र मोदीको नेतृत्वमा बसेको मन्त्रिपरिषद् बैठकले चौहानलाई सो पदमा नियुक्त गर्ने निर्णय गरेको भारतीय सञ्चार माध्यमहरुले जनाएका छन् । 

प्रथम चिफ अफ डिफेन्स स्टाफ जनरल विपिन रावतको २०२१ डिसेम्बर ८ मा हेलिकप्टर दुर्घटनामा निधन भएपछि उक्त पद रिक्त रहेको थियो । गढवालका राजपूत परिवारका चौहान भारतका दोस्रो सीडीएस हुन् । 

उनी सन् १९८१ मा गोरखा राइफल्समा भर्ना भएका थिए । आफ्नो करिअरको दौरान उनले धेरै कमान्ड, स्टाफ र निर्देशनात्मक नियुक्तिहरू सम्हालेका थिए । जम्मू र कश्मीर र उत्तरपूर्वी भारतमा भएको विद्रोह विरोधी अभियानहरूमा पनि उनको अनुभव छ ।

भारतको थल, जल र हवाई सेनासहित राष्ट्रिय सुरक्षाका विषयमा सीडीएसलाई सरकारसँग समन्वयकारी भूमिका दिने गरिएको त्यहाँको रक्षा मन्त्रालयले जनाएको छ ।