काठमाडौं । बंगलादेशमा एउटा डुंगा पल्टिदा मृत्यु हुने यात्रीको सङ्ख्या ५९ जना पुगेको छ । बंगलादेशको राजधानी ढाकाबाट ४६८ किलोमिटर उत्तरतर्फ पर्ने पञ्चगढ जिल्लाको करातोया नदीमा आइतबार दिउँसो डुंगा पल्टिएको थियो ।

उक्त दुर्घटनामा मृत्यु हुनेको सङ्ख्या लगातार बढ्दै गइरहेको ढाका ट्रिब्युनले लेखेको छ । त्यहाँका अधिकारीहरुले सो डुंगा दुर्घटनामा परी हराएका व्यक्तिको शव भेटिने क्रम जारी रहेको बताएका समाचारमा जनाइएको छ ।

पञ्जगढ जिल्लाका प्रहरी सुपरीटेन्डेन्ट एस एम सिराजुद हुडाले केही व्यक्ति हराइरेका र उनीहरुको खोजी कार्य जारी रहेको सोमबार अबेर बताएका थिए । सोमबारसम्म ५१ जनाको शव भेटिएकामा आज थप शव भेटिएको हो । 

अहिलेसम्म ५५ शवको सनाखत भएको समाचारमा जनाइएको छ । जिल्ला प्रशासनको सूचना डेस्कका अनुसार अझै कम्तिमा ३५ जना हराइरहेका समाचारमा उल्लेख छ ।

प्रहरीले डुंगाको क्षमताभन्दा बढी व्यक्ति राखिएकाले बढी भार भएर दुर्घटना भएको बताएको छ ।