जापान (टोक्यो) । जपानले अहिलेसम्मकै सबैभन्दा डरलाग्दो र खतरनाक सामुद्रिक आँधीको सामना गर्ने क्रममा करिब नब्बे लाख मानिसलाई आफ्ना घर छाडेर सुरक्षित गन्तव्यतर्फ जान सरकारले आह्वान गरेको छ । 

‘नान्मादोल’ नामक यस आँधीको कारण २ जनाको ज्यान जानुका साथै अन्य ९० जना घाइते भएका छन् । 

जापानको सुदूर दक्षिणी टापु क्युसुमा आइतबार बिहानबाट आँधी चलेको थियो । केही दिनभित्रै यो आँधी होन्सुको मुख्य टापुमा पुग्ने जलवायु विज्ञान विभागले भविष्यवाणी गरेको छ । 

आइतबार दशौँ हजार व्यक्तिले आपत्कालीन शिविरमा रात काटेका थिए । आँधीकै कारण ३ लाख ५० हजार घरमा विद्युत् आपूर्ति बन्द भएको छ । 

यातायात तथा व्यापार व्यवसाय अवरुद्ध भएको छ भने मुलुक भीषण बाढी र पहिरोको चपेटामा परेको छ । 

नान्मादोलको कारण प्रतिघन्टा अधिकतम २ सय ३४ किलोेमिटर वेगमा हुरी चलेको छ । २४ घन्टाभित्र केही क्षेत्रमा ४ सय मिलिमिटर पानी पर्ने अनुमान गरिएको छ ।

बुलेट ट्रेन सेवा, पानी जहाज सेवा तथा सयौँ हवाई उडान रद्ध गरिएको छ ।   

बीबीसीबाट ।