काठमाडौं । अर्थविद् डा. स्वर्णिम वाग्लेले अमेरिकी सहयोग परियोजना (एमसीसी) चीनको प्रतिवाद गर्नका लागि नआएको बताएका छन् । शुक्रबार काठमाडौंमा आयोजित एक अन्तरक्रिया कार्यक्रममा बोल्दै अर्थविद् डा. वाग्लेले एमसीसी चीनको विरुद्धमा नभएर लामो प्रक्रियाबाट नेपालको चाहनामा आएको बताएका हुन् ।
उनले सन २०११ देखि एमसीसी सहयोग ल्याउने प्रयास गरेरपनि २०१७ देखि विवादमा आएको बताए । नेपालमा ठूला पूर्वाधार विकास निर्माणमा आउने वैदेशिक लगानीको विषयमा वास्तविकता जानकारी नभएर हाउगुजी हुन थालेको उनको भनाइ छ ।
नेपालमा अझै पनि ठूला वैदेशिक दातृ निकाय भनेको एसियाली विकास बैंक, विश्व बैंक हो भन्ने मानसिकता रहेको उनले बताए । डा. वाग्लेले नेपालले ४० वर्षका लागि १ प्रतिशत ब्याजमा ऋण पाउँदासमेत खर्च गर्न नसकेको उदाहरण रहेको बताए ।
उनले अब वैदेशिक दातृ निकायहरूले विगतको जस्तो नेपाललाई सस्तो ब्याजमा ठूलो ऋण दिने झ्याल बन्द हुने अवस्थामा पुगेको पनि बताए । अब वैदेशिक ऋण नपाएर आन्तरिक स्रोतबाट लगानी खोज्नुपर्ने अवस्था आउनसक्ने उनको भनाइ छ ।