काठमाडौं ।  नेपाल राष्ट्रिय मुवाथाई संघले शनिबार प्राप्ति बतासलाई सम्मान गरेको छ । भक्तपुरको नगरकोटस्थित रत्नागिरि रिसोर्टमा आयोजित तेस्रो साधारणसभाका अवसरमा उनलाई संघले सम्मान गरेको हो ।

बतासले मलेसियामा गत महिना सम्पन्न आईएफएफए वल्र्ड मुवाथाई ग्राण्डस्लाममा रजत तथा आईएफएमए युथ वल्र्ड च्याम्पियनसिपमा कास्यपदक जितेकी थिइन् । 

प्राप्तिलाई वाग्मती प्रदेशका युवा तथा खेलकुदमन्त्री रत्नप्रसाद ढकाल, खेलकुद विकास परिषद्का सदस्यसचिव सूर्यलाल भण्डारी र नेपाल राष्ट्रिय मुवाथाई संघका अध्यक्ष गणेशलाल कक्षपतिले सम्मानपत्र र खादा लगाएर सम्मान गरेका हुन् ।

साधारणसभाले प्रादेशिक संरचनाको खेलकुद नीति अवलम्बन गर्दै विभिन्न प्रदेशमा संयोजक तोकेको छ । 

मुवाथाई संघले प्रदेश–१ मा भुपेश शाक्य, मधेस प्रदेशमा सन्तोस घलान, वाग्मती प्रदेश मनीष लिभी र सदस्यमा राहुल मोक्तान, गण्डकी प्रदेशमा निलिम अधिकारी, लुम्बिनी प्रदेशमा साजन माली, कर्णाली प्रदेशमा राजेश महर्जन र सुदूरपश्चिम प्रदेशमा उमेशकुमार खड्कालाई संयोजकको जिम्मेवारी दिएको छ ।