अमेरिका (सान माटियो) । अमेरिकाको क्यालिफोर्नियास्थित एउटा वृद्ध आश्रममा जुस भन्ठानेर भाँडा माझ्ने रासायनिक झोल पिलाउँदा एकजना वृद्धाको मृत्यु भएको छ । 

स्मरण क्षमता गुम्ने समस्याबाट पीडित महिला गट्रुड एलिजावेथ मुरिसन म्याक्जवेलको मृत्यु भएको हो । 

सान माटियोको एट्रिया पार्क सिनियर लिभिङ फ्यासिलिटीमा बस्दै आएकी उनी लगायत तीनजना महिलालाई गल्तीवश त्यही झोल जुस भनेर पिउन दिइएको थियो । 

क्रोन टेलिभिजनकाअनुसार कास्टिक तरल पदार्थ पिउन पुगेका उनीहरूलाई तत्काल अस्पताल पुर्‍याइएको थियो । 

वृद्धाश्रमले यस घटनामा संलग्न कर्मचारीहरूलाई निलम्बन गरिएको तथा अनुसन्धान कार्यमा स्थानीय निकायलाई आवश्यक सहयोग प्रदान गरिएको जनाएको छ । 

एउटा सुत्रले अंगुरको जुस र यस तरल पदार्थ हेर्दा उस्तै देखिने गरेको एनबीसी बे एरियालाई बताएको छ । एउटा जगमा राखिएको अखाद्य तरल पदार्थलाई कसैले जुस ठानेर गिलासमा भरेर बाँडेको हुनुपर्ने बताइएको छ । उनीहरूलाई दिइएको अल्कालिन तरल पदार्थले मानव शरीरको प्रोटिन नष्ट गर्छ । 

आफैँ खान समेत नसक्ने अवस्थामा रहेकी मृतक म्याक्ज्वेलका आठ छोराछोरी र बीसजना नातिनातिना छन् ।  

न्यूयोर्क पोस्टबाट ।