काठमाडौं । आपूर्तिमन्त्री शिव कुमार मण्डलले नजिकिँदै गरेको दशैंको अवसर पारेर काठमाडौंमा रहेका अन्तर्राष्ट्रिय ब्राण्डेड कपडा तथा जुत्ताको शोरुममा छापा मारेका छन् । सोमबार मन्त्री मण्डलको नेतृत्वमा भएको अनुगमनका क्रममा पसलहरुले कपडा, जुत्ता तथा अन्य फेन्सी सामानमा १० गुणाभन्दा बढी नाफा खाएको पाइएको छ । यसरी अत्यधिक नाफा खाने दरबारमार्गका ४ वटा ब्रान्डेड पसलमा शिलबन्दी गरिएको छ । 

दबारमार्गका नाइक, पुमा, वेन्टली र स्टोर वान ब्राण्डका पसलमा शिल गरिएको छ । आपूर्ति मन्त्रालयले दिएको जानकारीअनुसार ती पसलहरुले २६ सयको फेन्सी सामान २६ हजार रुपैयाँसम्ममा बिक्री गर्ने गरेको पाइएको छ । दरबारमार्गको नाइकको शोरुममा ४ हजार ७ सयको जुत्ता २६ हजार ९ सय ९० रुपैयाँमा बिक्री गर्दै गरेको आपूर्ति मन्त्रीसहितको टोलीले फेला पारेको थियो ।

त्यस्तै, ठमेल स्थितनर्थफेसको शोरुममा पनि छापा मारिएको थियो । त्यहाँ समेत केही कैफियत भेटिएपछि केही दिनभित्रै आवश्यक कागजात आपूर्ति व्यवस्थापन तथा उपभोक्ता हित संरक्षण विभागमा बुझाउन निर्देशन दिइएको छ । 

अनुगमनका क्रममा मन्त्री मण्डलले उपभोक्ता ठगी गर्नेलाई नछोड्ने बताए । मन्त्री मण्डलले ती शिलबन्दी गरिएका शोरुमको थप अध्ययन गरी कारबाहीको प्रक्रिया अघि बढाउन विभागलाई निर्देशन दिएका छन् । 

अनुगमन टोलीले राजधानीका ७ मुख्य व्यापारिक केन्द्रहरुमा छापा मारेको थियो ।