ताइपेई । संयुक्त राज्य अमेरिकाका दुई वटा युद्धपोत अन्तर्राष्ट्रिय पानीको माध्यमबाट ताइवान स्ट्रेटमा यात्रा गरिरहेका छन् । चीनले गत महिना जलमार्गमा अभूतपूर्व सैन्य अभ्यास गरेपछि पहिलो पटक अमेरिकी युद्धपोत ताइवान स्ट्रेटमा यात्रारत देखिएको हो ।

आइतबार अमेरिकी नौसेनाले एक विज्ञप्ति जारी गर्दै ताइवान स्ट्रेटमा अमेरिकी युद्धपोतको यात्राले स्वतन्त्र र खुला इन्डो–प्यासिफिकको लागि संयुक्त राज्यको प्रतिबद्धता देखाउने बताएको छ । 

अमेरिकी सभामुख न्यान्सी पेलोसीले ताइपेईको भ्रमण गरेपछि ताइवान स्ट्रेटमा तनाव सबैभन्दा उच्च स्तरमा पुगेको थियो । ताइवानलाई आफ्नो क्षेत्र दाबी गर्ने चीनले स्वशासित टापुको वरपर दिनभर हवाई र समुद्री अभ्यास गरेर प्रतिक्रिया जनाएको थियो । 

ताइवानलाई आफ्नो नियन्त्रणमा ल्याउन बल प्रयोग गर्न तत्पर रहेको बेइजिङले उक्त यात्रालाई चीनको आन्तरिक मामिलामा हस्तक्षेप गर्ने अमेरिकी प्रयासको रूपमा हेरिरहेको अन्तर्राष्ट्रिय समाचार संस्था अलजजिराले जनाएको छ । 

तीन अमेरिकी अधिकारीहरूले नाम नछाप्ने सर्तमा रोयटर्सलाई भने, “अमेरिकी नौसेनाका जहाजहरु चान्सेलर्सभिल र एन्टिएटमले उक्त अपरेसन गरिरहेका थिए ।” 

त्यस्ता अपरेसनहरू सामान्यतया पूरा हुन आठ देखि १२ घण्टासम्म समय लाग्छ । उक्त कार्य चिनियाँ सेनाले नजिकबाट निगरानी गरिाराखेको अलजजिराले जनाएको छ । 

बेइजिङको क्रोधलाई आकर्षित गर्दै हालैका वर्षहरूमा अमेरिकी युद्धपोतहरूले बेलायत र क्यानडा जस्ता राष्ट्रको सहयोगमा नियमित रूपमा स्ट्रेटको यात्रा गर्दै आएको छ ।