बुटवल । रुपन्देहीको बुटवल उपमहानगरपालिका १० मा अन्तर्राष्ट्रिय सम्मेलन केन्द्रको निर्माण सम्पन्न भएको छ । एक हजारजना अट्ने सभा हलसहितका अन्य १२ हल रहेको सम्मेलन केन्द्र निर्माण सम्पन्न भएको हो । बुटवल उपमहानगरले संरक्षण गरेको बुटवल मण्डप संघीय सरकार सहरी विकास मन्त्रालयको १ अर्ब ११ करोड लागतमा सम्मेलन केन्द्र तयार पारिएको हो । सम्मेलन केन्द्रको आज प्रधानमन्त्री शेरबहादुर देउवाले उद्घाटन गर्दैछन् । 

नेपालको झन्डा आकारमा तयार पारिएको सभा हल तत्कालै प्रयोग गर्न मिल्ने गरी तयार भइसकेको छ । हलमा ८७२ वटा फिक्स कुर्सी जडान गरिएको बुटवल सभाहल तथा प्रदर्शनी केन्द्र निर्माण आयोजना प्रमुख धर्मेन्द्र पन्थीले जानकारी दिए । मुख्य उद्घाटन कार्यक्रम यही हलमा हुने पन्थीले बताए ।  

सभा हलसहित ६ वटा बैठक हल र दुईवटा बहुउद्देश्यीय हल भवन तयार भएको छ । सर्भिस भवन, कर्मचारी आवास तथा अन्य आवश्यक पूर्वाधार निर्माण भएको छ । सम्मेलन केन्द्रमा ५० र ४२ सिट क्षमताका दुईवटा लेक्चर हल तथा ८० र ३०० जना क्षमताका सेमिनार हल छन् । ७२ जनादेखि १२६ जना क्षमताका ६ वटा मिटिङ हल, तथा ३५० र ५८६ जना क्षमताका थप दुईवटा हल छन् । 

सबै हलमा एकपटकमा २९ सयजना अटाउनसक्ने आयोजना प्रमुख धर्मेन्द्र पन्थीले बताए । सम्मेलन केन्द्रका १७ सय कुर्सी आवश्यकता अनुसार सार्न मिल्ने छन् । अपांगमैत्री सम्मेलन केन्द्रमा चार सयवटा चार पांग्रे र चार सयवटा मोटरसाइकल राख्न मिल्ने गरी पार्किङ स्थल र हेलिप्याड समेत बनाइएको छ ।

सम्मेलन केन्द्र सञ्चालन भएपछि बुटवलमा अन्तर्राष्ट्रियस्तरका सभा, सम्मेलन गर्न सहज हुने भएको छ। विद्युतका लागि छुट्टै सब–स्टेसन राखिएको छ । ६३० केभी क्षमताको विद्युत ट्रान्सफर्मर राखिएको छ । 

खोनपानीका लागि बोरिङ पनि छुट्टै बनाइएको छ । सम्मेलन केन्द्र प्रवेश गर्दा आकर्षक बनाउन केही भागमा दुबो लगाइएको छ भने सभा हल अगाडि पोखरी निर्माण गरिएको छ । प्रवेश हुने र बाहिरिने गरी पाँचवटा अलग–अलग गेट तयार पारिएको छ । 

विशिष्ट प्रवेशद्वार र सर्भिस गेट पनि बनाइएको छ। बाँकी तीन वटामध्ये दुईवटाबाट सम्मेलन केन्द्र प्रवेश गर्ने र एउटा गेटबाट बाहिरिने व्यवस्था मिलाइएको छ । 

बाल उद्यान, कफी सप, रिफ्रेस हल, रजिस्ट्रेसन र टिकट काउन्टरसमेत बनाइएको छ । सम्मेलन केन्द्र अन्तराष्ट्रियस्तरको कार्यक्रम गर्न मिल्ने गरी तयार भएको आयोजना प्रमुख पन्थीले बताए । 

२०७१ साल पुसबाट निर्माण सुरु गरिएको सम्मेलन केन्द्र कोरोना महामारी र रुख कटानका कारण प्रभावित भएको थियो । दोस्रो चरणमा २०७४ सालमा सम्झौता गरी २०७६ कात्तिकसम्मको समय अवधि तोकेर काम भएको हो । तर, तोकिएको समयमा काम नगरेपछि २०७९ साल कात्तिकसम्म म्याद थप गरिएको थियो । थप भएको म्याद अगावै २०७८ असारमै निर्माण सम्पन्न गरेको बुटवल सभाहल तथा प्रदर्शनी केन्द्र निर्माण आयोजना प्रमुख पन्थीले बताए । सम्मेलन केन्द्र ९.६ बिगाहामा बनेको छ ।

सञ्चालन अधिकार कसलाई ?

अन्तर्राष्ट्रिय सम्मेलन केन्द्रको सञ्चालन कसले गर्ने भन्नेमा अन्योल छ । निजी क्षेत्र वा स्थानीय तहले सञ्चालन अधिकार लिन कार्यविधि बनाउनुपर्ने भएकोले अन्योल सिर्जना भएको आयोजना प्रमुख पन्थीले बताए । उनले काठमाडौंको सभागृह काठमाडौंको स्थानीय तहले सञ्चालन गरेको बताउँदै पन्थीले यहाँ पनि बुटवल उपमहानगरले सञ्चालन गर्न सक्ने भए पनि कार्यविधि नबनेकाले सञ्चालन अन्योल बनेको बताए । 

यता, बुटवल उपमहानगरपालिका प्रमुख खेलराज पाण्डेले अन्तर्राष्ट्रिय सम्मेलन केन्द्रको सञ्चालन अधिकार पाएमा उत्कृष्ट कार्यसम्पादन गर्ने बताउँछन् । उनले सहरी विकास मन्त्रालयले कार्यविधि बनाएर हस्तान्तरण गरेमा उपमहानगर सञ्चालनको लागि तयार रहेको बताए ।

उनले भने, “हाम्रै नगरमा छ । यो निर्माणको चरणमा पनि हाम्रै योगदान छ । सञ्चालनको अवसर पायौँ भने हामी यसको लागि तयार छौँ । उत्कृष्ट बनाएर देखाउँछौँ ।” 

यसरी प्राप्ति भएको थियो जग्गा 
अहिले सम्मेलन केन्द्र निर्माण भएको जग्गा नेपाली सेनाको मातहतमा थियो । स्व. गिरिजाप्रसाद कोइराला प्रधानमन्त्री रहँदा यहाँको जग्गालाई नेपाली सेनाबाट नगर मातहत ल्याइएको हो ।

बुटवल मिलन चोक सडक डिभिजनको कम्पाउन्डभित्र मेला महोत्सव गर्ने निजी उद्योगी व्यवसायी सङ्घहरूलाई जग्गा सानो भएपछि बाहिर जग्गाको खोजी सुरु भएको हो । यहाँको जग्गाको लागि बनमन्त्री दिलेन्द्र बडू बुटवल आएको समयमा बुटवल उद्योग वाणिज्य संघ र नेपाली कांग्रेसले अन्तरक्रिया गरी जग्गा माग गरेका थिए ।

तीन स्थानमा हेरिएको जग्गामा यो क्षेत्रको जग्गा सबैभन्दा उत्कृष्ठ ठानेर जग्गा प्राप्तीको प्रक्रिया शुरु भएको बताउँछन् बुटवल उद्योग वाणिज्य संघका पूर्व अध्यक्ष नवराज श्रेष्ठ । बुटवल मण्डपको जग्गा प्राप्तीको लागि तत्कालीन सांसद स्व. शूर्यप्रसाद प्रधानलाई जग्गा प्राप्तीको संयोजक बनाएर अघि बढेको उनले बताए । उनले प्रधानको नेतृत्व र कोइरालाको प्रयासबाट जग्गा प्राप्ति भएको बताए । 

सहरी विकास मन्त्री मेटमणि चौधरीले उद्घाटन गर्ने तयारी गरिएको कार्यक्रम स्थगित गरी प्रधानमन्त्री देउवाले उद्घाटन गर्ने भएका हुन् । भदौ १ गते उद्घाटनको अन्तिम तयारीमा रोकिएको हो । आयोजना प्रमुखले तयारी नपुगेकोले रोक्ने आदेश आएकोले कार्यक्रम रोकिएको प्रतिक्रिया दिएका थिए । नेकपा एमाले उपाध्यक्ष विष्णु पौडेलले आफ्नो योजनाको रूपमा शिलान्यास गरेको यस केन्द्रको उद्घाटन रोक्न पहल गरेको नेकपा एस निकटका जिल्ला नेताहरू बताउँछन् ।