काठमाडौं । सत्तारूढ दल नेपाली कांग्रेसका महामन्त्री विश्वप्रकाश शर्माले एक व्यक्ति दुईपटकभन्दा बढी प्रधानमन्त्री हुन नपाउने व्यवस्था गर्नुपर्ने बताएका छन् ।

उनले राष्ट्रपति एकपटकसम्म, प्रधानमन्त्री दुईपटकसम्म, मन्त्री तीनपटकसम्म र चारपटकभन्दा बढी सांसद हुन नपाउने व्यवस्था गर्न उपयुक्त हुने धारणा राखेका हुन् ।

शनिबार काठमाडौंमा आयोजित युवासँगको अन्तरक्रिया कार्यक्रममा उनले एकै व्यक्तिलाई सिंहदरबार छिर्ने अधिकार पटक–पटक दिन नहुने तर्क गरे । उनले राजनीतिलाई दुस्मनीका रूपमा लिने गरी अभिव्यक्ति दिन नहुने पनि बताए ।

“एकपटक राष्ट्रपति, दुईपटक प्रधानमन्त्री, तीनपटक मन्त्री र चारपटकभन्दा बढी सांसद हुन नपाउने व्यवस्था हुनुपर्‍यो,” उनले भने, “राजनीतिलाई रूपान्तरण गर्ने हो भने त्यसको सुरुवात सिंहदरबारबाटै हुुनुपर्छ । मैले त भन्ने गरेको छु– राजनीतिलाई दुस्मनीको रूपमा पनि लिनु हुन्न ।”

महामन्त्री शर्माले जनताको कामलाई सहज बनाउन सरकारले ध्यानकेन्द्रित गर्नुपर्ने आवश्यकता पनि औँल्याए ।