इस्लामावाद । पाकिस्तानको उत्तर पश्चिम क्षेत्रमा पोलियो खोप टोलीलाई सुरक्षा दिइरहेका दुईजना प्रहरीलाई बन्दुकधारीहरूले गोली हानेर हत्या गरेका छन् । 

खोप टोलीमा संलग्न दुई व्यक्ति भने आक्रमणमा सकुशल रहेको प्रहरीले जनाएको छ । 

पाकिस्तानमा स्थानीय पोलियो खोप टोलीहरूमाथि प्रायः खोप कार्यक्रम विरोधी लडाकुहरूले आक्रमण गर्ने गरेका छन् । उनीहरूले यस्ता अभियानलाई पश्चिम जगत्को मुस्लिम समुदायको प्रजनन क्षमता निष्क्रिय पार्ने षडयन्त्रको संज्ञा दिने गरेका छन् । 

विश्वमै पाकिस्तान र अफगानिस्तानमा अझै पोलियोका घटना देखिने गरेको छ । पक्षघात निम्त्याउने पोलियो रोग प्राणघातकसमेत हुनसक्छ । 

प्रहरीकाअनुसार आक्रमण पछि मोटरसाइकलमा भागेका दुईजना बन्दुकधारीले नजिकैबाट लुकेर गोली चलाएका थिए । 

यो घटना उत्तर पश्चिमी पाकिस्तानको ट्यान्क जिल्लाको कोट अजाम भन्ने स्थानमा घटेको हो । पाकिस्तानमा अहिले सम्म थुप्रै पोलियो अभियानकर्ता र उनीहरूको सुरक्षामा खटिनेहरूले यस्तो आक्रमणमा ज्यान गुमाइसकेका छन् । 

पन्ध्र महिनापछि पहिलो पटक अप्रिलमा एउटा पोलियोको घटना देखिएको पाकिस्तानले जनाएको छ । त्यसयता मात्र अफगानिस्तानको सिमानासँग जोडिएको र विगतमा तालिवानको बलियो पकड रहेको उत्तरी वाजिरस्तानमा थप १३ वटा पोलियोको घटना देखिएका छन् । 

बीबीसीबाट ।