बेइजिङ । कोभिड–१९ को प्रकोप रोक्न ‘लकडाउन’ घोषणा गरिएपछि चीनको हाइनान टापुको लोकप्रिय रिसोर्ट सहर सान्यामा करिब ८० हजार पर्यटक फसेका छन् ।

कोरोनाका कारण सार्वजनिक यातायात बन्द गरिएको छ । सहरभित्र मानिसको आवागमनमा शनिबार बिहानैदेखि रोक लगाइएको अधिकारीहरूले बताएका छन् ।

फसेका पर्यटकले सात दिन त्यहीँ बस्नुपर्ने र छोड्नुअघि कोभिड–१९ का पाँच परीक्षणहरू पास गर्नुपर्ने अमेरिकी समाचार संस्था सीएनएनले जनाएको छ ।

उपमेयर हे शिगाङले करिब ८० हजार पर्यटक सहरमा अड्किएको बताएका छन् । हाल सान्यामा रहेका सबै मानिसलाई स्थानीय समयानुसार शनिबार बेलुका ६ बजेपछि हाइनान प्रान्तबाट बाहिर निस्कन अनुमति नदिइएको प्रान्तीय अधिकारीहरूले बताए ।

ग्रीष्मकालीन पर्यटन सिजनको समयमा लकडाउन घोषणा गरिएको हो । सान्या चीनको एक लोकप्रिय गन्तव्य हो । यो बलौटे समुद्री तटहरू, जंगलहरू र महँगा होटेलहरूका लागि चर्चित छ ।

शनिबार मात्र सान्या छोड्ने उडानहरूमध्ये ८० प्रतिशत उडान रद्द गरिएको छ । सान्याबाट प्रस्थान गर्ने सबै रेलहरू बन्द गरिएको राज्य प्रसारक सीसीटीभीले जनाएको छ ।