काठमाडौं । नेपाली राष्ट्रिय फुटबल टोलीका गोलकिपर किरण चेम्जोङले सोमबार क्लबको उपाधि ‘सेलिब्रेसन’का क्रममा प्रेमिकालाई सार्वजनिक गरेका छन् ।

माल्दिभ्सको शीर्ष डिभिजन धिवेही प्रिमियर लिगको उपाधि जितेपछि सेलिब्रेसन गर्ने क्रममा किरणले प्रेमिका कञ्चन निरौलालाई मैदानमै लगेर औँठीसहित प्रेम प्रस्ताव गरेका थिए ।

प्रेमिकालाई औँठी लगाइदिएको भिडियो राख्दै उत्कृष्ट गोलकिपर घोषित किरणले लेखेका छन्, “मैले तिमीलाई रोजेको छु । र, बारम्बार रोजिरहनेछु । बिनाविराम, मुटुको धड्कनमा शंका नगरी तिमीलाई रोजिरहनेछु । मेरो जीवनमा आएर मेरो उतार–चढावमा साथ दिएकोमा धन्यवाद भन्न चाहन्छु । कठिन र अप्ठ्यारो परिस्थितिमा पनि तिमीले मलाई पागलजस्तो हँसाउन सक्छौ । इमानदारपूर्वकभन्दा मलाई खुसी बनाएकी छौ ।अद्भुत र अविस्मरणीय समय हो । म यो दिन मेरो अन्तिम साससम्म बिर्सने छैन ।”

कञ्चन एयर होस्टेज रहेको बताइएको छ । कञ्चन र किरण पछिल्लो डेढ वर्षयता सम्बन्धमा रहेको बताइएको छ ।

किरण आबद्ध माजिया स्पोर्ट्स एन्ड रिक्रिएसनले सोमबार क्लब इगल्समाथि ५–० को नतिजा निकाल्दै उपाधि जितेको थियो । उपाधि ट्रफी वितरणपछि टिमका सबैजनाले खुसी मनाइरहेका थिए ।

त्यही बेला किरणले मैदानबाहिर रहेकी कञ्चनलाई बोलाएर टिमले सेलिब्रेसन गरेको ठाउँमा लगे । साथीसँग औँठी मागे । एउटा घुँडा मैदानमा टेकेर कञ्चनलाई प्रस्ताव राखे । उनको प्रस्तावलाई कञ्चनले स्वीकार गरिन् । किरणले औँठी लगाइदिएर कञ्चनको हातमा चुमे ।

किरणले यसअघि सन् २०१८ को लिगमा पनि उत्कृष्ट गोलकिपरको अवार्ड जितेका थिए ।